Shillong, Jylliew 29: Ka ophis jong ka District Social Welfare Officer (DSWO) Mawkyrwat ha ryngkat ka jingïatreilang bad ka office jong ka District Child Protection Officer, District Legal Services Authority, Mawkyrwat bad ka Synjuk ki Seng Samla Shnong, Mawkyrwat ka la rakhe ïa ka sngi kaba la tip kum ka International Day Against Drug Abuse and Illicit Trafficking halor ka phang “Let’s Develop Our Lives, Communities and Identities –Without Drugs” ha Sngap Syiem College, Mawkyrwat.
Haba kren ha kane ka jingïalang na ka liang ka kongsan ka Kong I. Laloo, IAS, DC ka Mawkyrwat ka la ong ba ïa kane ka program la pynlong na ka bynta ban ai jingtip ïa ki samla ha kaba ïadei bad ka jingkyrni ha ki jingdih drug bad ki jingktah jong ki ïa ka jingkoit jingkhiah, ka imlang sahlang bad ha kajuh ka por kane ka program kan long kum ka jingpynkynmaw khamtam na ka bynta ki khynnah samla ha kaba ïadei bad kine ki jingkyrni dih drug, ka jingdie ïa ki khynnah ki kynthei, ka jingarmet ha ka por dang khynnah, ka jingshongkha khynnah, bad ki jingshah khñiot beiñ ïa ki kynthei ki khynnah kiba long kiwei na ki jingsniew kiba la dei ban tip ban lah ban teh lakam khnang ban pynduna ïa ki.
Ka la ong ruh ka donkam eh ka jingïatreilang jong uwei pa uwei ne kawei pa kawei khnang ban lah ban tehlakam ïa kum kine ki jait jingsniew. Shuh shuh ka la ai ruh ka jingkyntu na ka bynta ki samla ba kin bret sha jngai ïa kine ki jait jingsniew bad ba kin kiar na ki, namar kine ki ktah ïa ka jingim briew. Kumta ka khot ka wer lang ïa baroh ban long kiba ïatreilang khnang ban lah ban rad-dyngkhong ïa kine ki jait jingsniew kiba la sdang ban kyrsoi hangne hapoh jong ka District.
Ka Kong L. Giri, Counselor Krippa Foundation, Shillong haba kren ha kane ka sngi ka la ong ba ka kyiad bad ki drug ki dei ki jait jingpang ki bym kheiñ ïa ka jinglong shynrang ne kynthei, snem, jaidbynriew hynrei ka dei ka jait jingpang kaba ktah ïa baroh haba ngi mat bad kyrni ha ki. Ka la ai ruh ka jingbatai halor ki jingsniew kiba kine ki jait jingdih ki wanrah na ka bynta u briew ne ka briew, ka ïing ka sem bad ruh ïa ka imlang ka sahlang.
Shuh shuh ka la ai ruh ka jingkyrpad na ka bynta ki khynnah skul ba kim dei ban pynmlin ha kine ki jait jingdih hynrei ki dei ban kiar na ki khnang ba kin lah ban lait na ki jait jingpang kiba bun jait. Ka ai ruh ka jingkyntu na ka bynta ki kmie ki kpa ba ki dei ban peit bha ïa ki khun bad ban pynlut por ruh bad ki khnang ba ki khun ki kti jong ki kin lait na kine ki jait jingsniew.
Ha kane ka sngi la ïoh ruh ka jingkren na u Bah W. Biam, ADC cum Secretary, District Legal Services Authority, Mawkyrwat, u Dr. S.S. Khongkliam, Principal ka Sngap Syiem College, Mawkyrwat, Bah H.G. Lyngdoh, Superintendent of Police, South West Khasi Hills District, Mawkyrwat bad Dr. M. Marbaniang, District Medical & Health Officer, South West Khasi Hills District, Mawkyrwat.
La pynïaid ïa kane ka program da u Bah W. Syiemïong, Chairman Synjuk Seng Samla Shnong, South West Khasi Hills District uba la ai ruh ka jingkren pdiang bad ka jingkren khublei na u Bah S.W. Passah, District Child Protection Officer, South West Khasi Hills District.
