Shillong, Naiwieng 18: Mynta ka sngi ka 18/Naiwieng/2026 Ka Khasi Students’ Union (KSU), Mawrengkneng Circle kala ioh bat ïa saw ngut ki briew kiba dei ki nong Bangladesh, kiba la rung sha India bad sha ka Jylla Meghalaya khlem ki kot ki sla kiba biang katkum ka aiñ.
Ha ka jingtohkit haba iadei ba kane ka jingjia, la ïoh jingtip ba kine ki briew la kit iaki naka shnong Skhenpyrsit West Jaintia Hills District bad ki la ïoh jingïarap na ki katto katne ki briew kiba leh kum ki agent ban pynpoi ïa ki sha ki jaka ba ki thmu ban leit.
Katkum ki jingtip bad ki dur video kiba ka Seng ka la ïoh lum, la suba ba kine ki briew ki la siew haduh T. 45,000 marwei na ka bynta ban pynrung ïa ki sha India lyngba ki rukom kiba beaiñ, kynthup ïa ka jingpynkhreh ïa ki kot ki sla thok kum ki Aadhaar Card.
Ka seng ka la ïoh jingtip ruh ba u nongñiah kali uba don bynta ha ka kam kit briew u la kam ba u la ïoh pdiang ïa ka phone call na uwei u briew ban bthah ïa u ban kit ïa kine ki briew, hynrei u la ong ba um tip eiei shaphang ka jinglong jong kane ka kam. Hadien kata, u la bthah ïa ki ban hiar ha Dam.
Ka Seng ka sngewkhia jur halor kane ka jingjia, khamtam haba la mih ki jingsuba ba don ki agent kiba trei lang ban pynsuk ïa ka jingrung beaiñ sha ka ri lyngba ki kot ki sla thok.
Lada kane ka jingjia ka long kaba shisha, ka pynmih ïa ki jingkylli kiba khia halor ka jingshngaiñ jong ka ri, ka jinglong shisha jong ki kot ki sla ithuh briew bad ka jingtreikam jong ki bor sorkar kiba dei ban khmih ïa ka jingrung bad mih jong ki briew sha ka ri.
Na ka liang ka KSU Mawrengkneng Circle, ka maham jur ïa kino kino ki briew ne ki kynhun kiba donkti ha ka kam pynrung beaiñ ïa ki nongwei sha ka ri, ka jingpynkhreh ïa ki kot ki sla thok bad ka jingai jingïarap ban leh ïa ki kam kiba long pyrshah ïa ka aiñ, ba kin sangeh noh mardor ïa kine ki kam.
Ka Seng kan ym shu sngap jar haba don ki briew kiba shim kabu ïa ki jingduna ha ka rukom treikam jong ka ain na ka bynta ban kamai pisa, kaba lah ban ktah ïa ka jingshngaiñ jong ka ri bad ïa ki hok jong ki trai ri trai muluk.
Ka Seng ka la aiti noh ïa kine saw ngut ki briew sha ka Diengpasoh Police Station na ka bynta ban leh ïa kaba donkam katkum ka aiñ bad ban pynlong ïa ka jingtohkit kaba bniah.
Ka Seng ka kyntu ïa ki bor pulit ba kin pynlong ïa ka jingtohkit kaba bniah, ban lap ïa ki agent kiba la suba donkti bad ïa baroh kiba donkti ha kane ka kynhun treikam, bad ban shim ïa ki sienjam kiba dei katkum ka aiñ.
Ka Seng ka pynpaw biang ba kane ka mat ka dei kaba hap tohkit bha bad ai ka jingpynsaja ba eh ia kiba donkti bad ïa ki kam beaiñ, ka jingpynkhreh ïa ki kot ki sla thok bad ïa kito kiba pynsuk ïa ka jingrung beaiñ sha ka ri. Ka aiñ jong ka ri ka dei ban treikam salonsar khlem da don ka jingïapher, bad baroh kiba donkti ki dei ban shah pynshitom katkum ka aiñ.




