Kem drok ki pulit ANTF na Lum Survey ioh kurup 10.10 gram u drok heroin   

Shillong, Naiwieng, 18: Ka ophis treikam jong u Superintendent ki pulit ka Anti Narcotics Task Force, Meghalaya, Shillong, u Vikash Kumar, IPS u la ioh jingtip ba thikna ha kaba iadei bad ka kam khaii drok, ha kaba ka kynhun jong ka Anti-Narcotics Task Force (ANTF), Meghalaya, kala pynlong iaka jingkhynra ha Lumsurvey ha kane ka nongbah Shillong ha ka 17/Naiwieng/2026.

Kane ka kynhun kala dep pynlong iaka jingkhynra ha ki lai tylli ki jaka ba hap la ka jong kaba pynlong iaki ban lap bad kurup noh iaki khyndai tylli ki song sabon jong u drok heroine ba khia 110.34 gram na ka iingsah jong u Jahiruddin. Kaba ar ka dei na ka iingsah jong ka Jamela Khatun, ha kaba la ioh kurup 63 tylli ki bitor barit ba don 10.10 gram u drok heroin. Katba kaba lai dei na ka iingsah jong u Moriom Khatun, ha kaba la dep kurup 65 tylli ki bitor barit ba khia kumba 10.17 gram u drok heroin.

Ha katei ka jingkhynra, baroh ki drok heroine ba la ioh kurup ka long 130.61 gram, ba kynthup khyndai tylli ki song sabon bad 128 tylli ki bilor barit. La dep ujor ruh da ka ejahar ia kine ki lai tylli ki jingjia pyrshah ia kine ki lai ngut ha Cantonment Beat House. Katba ka jingtohkit ka dang iaid shakhmat khnang ban lap ksai ia kiba donkti, katno ka jingdon kane ka kam khaii drok bad kiwei kiwei ki jingdonkti. Kane ka dei ka jingkhynra kaba ar ha Lumsurvey kaba la jia shi miet shi miet.

Kham mynshuwa ha ka 7/Naiwieng/2026, haba katei ka kynhun kala ioh jingtip ba pura ha kaba iadei bad uba shah suba ba halor ka kam khaii drok, u Alim Uddin, kila pynlong da ka jingkhynra hapoh ka kamra jong u ha Lumsurvey.

Ha katei ka jingkhynra, la lap bad kurup noh ar tylli ki song sabon ba don 27.00 gram u drok heroin. Hadien katei, la kem noh ia u Alim Uddin bad ka kurim jong u, ka Ishatun Nesa bad la dep ujor da ka ejahar.

Katba ha ki ar tylli ki jingkhynra kiba la pynlong ha ka 7 bad 17/Naiwieng/2026, kumba 157.61 gram u drok heroin, uba shongdor T. 75 lak, la khaii beain ha ka iew, la kurup noh bad la shimkhia ia kane pyrshah ia kine ki san ngut kiba donkti.

Kine ki jingtreikam kiba jop ki pyni iaka jingtrei shitom kaba bteng, kaba iatreilang bad kaba shong nongrim ha ki jingtip ba bniah jong ka ANTF ban pynduh pyndam iaki kynhun die drok hapoh shnong bad ban khanglad iaka jingioh iaki jingdih ba pynbuaid hapoh Shillong. Ka jingtohkit kaba kham bniah ka dang iaid shakhmat.

 

 

What Next?

Recent Articles

Leave a Reply

Submit Comment

*