Leit kynduh ka KSU ia ki nonghikai KJDSTA kiba dang ia khih ha Pohkseh

Shillong, Naiwieng 18: Ka Khasi Students’ Union – Central Executive Council mynta ka sngi ka 18 tarik Naiwieng, 2026 ka la leit ban ïakynduh ïa ki nonghikai jong ka Khasi Jaiñtia Deficit School Teachers Association (KJDSTA) ha madan Pohkseh kiba dang don hapdeng ha jingïakhih ban dawa ïa ka hok ka jong ki. Ka jingïakynduh jong ka Seng ïa kine ki nonghikai ka long ban ai ka jingkyrshan kaba pura ha ki mat jingdawa ka jong ki.

Ka Seng ka kwah ban pynsngew ruh ba ka bitar shibun eh ïa ka jingsngap mynthi ka Sorkar bad ban thok ban shukor ïa ki la bun bun sien ha ki mat jingdawa ka jong ki. Kadei ka jingleh jong ka Sorkar ba ki nonghikai na kapor sha ka por ki hap ban mih madan ban dawa ïa ka hok ka jong ki.

Ka jaka jong ki nonghikai ka dei hapoh kamra klas ym ha madan hynrei ka jingshukor ka Sorkar bad ki polisi kaba ka wanrah ka bym tei ïa ka bha ka miat jong ki, ka pynlong ïa ki ban mih madan. Ka jinghiar ka pule puthi ha ka jylla ka dei namar ka Sorkar kam sngap ïa ka jing pynsngew jong ki nonghikai hynrei ka leh katba ka mon tang ban pynbiang ïa ka pla tyngka jong la jong khlem da pyrkhat ïa ka lawei jong ki samla pule.

Ha kajuh ka por ka Sorkar ka pynrem jur ïa ka jingkren jong u Dy. CM, Prestone Tynsong da kaba pynïahap ba ki nonghikai kiba ïa khih ki long kiba bam kruiñ ïa ka jaitbynriew. Kane ka jingkren tohmet na ka liang jong u Dy. CM ka long kaei kaei ka bym lah ban pdiang bad ka pyni ruh ba kane ka Sorkar ka kheiñ poh ïa ki nonghikai jong ka jylla.

Lada u Dy. CM u sngew biang ïa lade haduh katta u dei ban ot shuwa ïa ka tulop jong la jong sa kren pat ïa kiwei. Haba kiwei ki jylla na kapor sha ka por ka pynkiew ïa ka tulop ki nonghikai khnang ba kin ïoh ban ai shuh ka jing shakri kaba pura, ka dei tang ha ka jylla ka jong ngi ba ngi ïohi ba ka Sorkar ka ot bad pynduna man ïa ka tulop.

Ha kumne, hato ka jylla kan kiew ha ka pule ka puthi ne kan dang hiar ar sut. Ka Sorkar ka lah ban pynlut da ki phew crore ha ki kam tamasa, hynrei ba peit ïa ka bha ka miat jong ki nonghikai ka artatien.

Ka Seng ka ai ka jingkyrshan kaba pura ïa la ki jong ki nonghikai bad ka kyntu ruh ïa ki School Managing Committee jong ki skul bapher bapher ha ka jylla ba kin ai ka jingkyrshan kaba pura ïa ki nonghikai deficit jong ka skul ka jong ki bad ka ïawer ruh ïa ki khynnah skul ba kin mih shakhmat ba kyrshan ïa la ki jong ki nonghikai.

Lyngba kane ka kyrwoh ba Seng ka kwah ban pynpaw ba lada ka Sorkar kan dang ïai bteng ban  sngap mynthi ïa ka jingdawa ki nonghikai deficit, ka Seng kan hap ban mih shakhmat ban pynbor ïa ka Sorkar ban pynurlong ïa ki mat jingdawa jong ka KJDSTA. Kane ka long katkum ka kyrwoh kaba la phah da u samla Reuben A. Najiar General Secretary  Khasi Students’ Union.

What Next?

Recent Articles

Leave a Reply

Submit Comment

*