Shillong, Jymmang 21: Ki shipai BSF katba ki dang iaid pahara ha khappud bad ka Bangladesh kila ioh ban bat ia kawei ka trok kaba la kit shini ha Bholaganj kaba hap hapoh East Khasi Hills District da ka jingthmu ban phah sha Bangladesh.
Ki shipai BSF kiba dei na ka kynhun 110 Battalion kila ioh bat ia ka trok kaba kit shini kaba mut ban leit sha khappud bad ka Bangladesh, ha kane ka jingioh bat ia kane ka trok la ioh ban kem ar ngut ki nong India.
U shini bala ioh ban kurup na kane ka trok u long haduh 10,000 kilo, haba la kylli na ka liang jong ki ar ngut ki briew kiba don ha kane ka trok, u draibar bad u nongbud kim shym lah ban ai ka jubab kaba shai haba ia dei bad u tei u shini.
Ha ka juh ka por kim shym lah ban pyni ruh ia ki kot ki sla kiba biang ha kaba ia dei bad kane ka jingkit shini, na ka liang jong ki BSF kila kurup noh ia shini bad kem noh ia ki ar ngut ki nong India, ki BSF ia u shini kila aiti noh sha ki Customs kiba don ha Bholaganjban leh ia kaba don kam katkum ka ain.
