Shillong, Kyllalyngkot 30: Ha ka 28 tarik mynta u bnai ki shipai BSF ha dien ba ki la ioh jingtip kaba kham bniah ki la ap ktem bha ha BOP Latangtilla Ex-108 Bn, kaba hap hapoh Jantia Hills District jong ka jylla Meghalaya ki la ioh ba kem ia u Pulin Sinha, 36 ka rta khun jong u Mahadav Sinha,jong ka shnong Gokul Singher Gaon, Ps- Srimangal, Distt- Molvibazar, Bangladesh.
Ki shipai BSF ki la kem ia une u briew katba u dang rung na Bangladesh sha India bad ka la pynkyndit ia ki BSF ka long ba na une u khar Bangladesh la ioh ban kurup ia ka dur thep vote jong ka Ri India nalor kata la ioh ruh ia ka ATM Cards kaba dei jong ka ICICI Bank, ka license niah kali.
Na ka liang jong ki BSF ki khlem batai pat kane ka dur thep vote ka laba la ioh kurup na u tei u Khar Bangladesh kadei na ka constituency aiu bad ki klhlem kdew ia ka jaka kaba u sah na ka liang jong ki BSF ki la buh rieh ia kane ban lap shuh ia kiwei pat.
Kiwei pat ki khar Bangladesh kiba la ioh ban kem da ki BSF katba ki dang thmu ban rung sha India na Lyngkhat ki dei u Md Zakaria, Md Sohel Ahmed, SK Babibulla Zalali ia kine baroh la aiti sha ki bor jong ka ain ban leh ia kaba don kam.(SP News)
