Shillong, Nailar 20: Ki shipai BSF ba dei peit ia ki khpappud ka jylla Meghalaya bad ka Bangladesh kila ioh ban kem 3 ngut ki khar Bangladesh katba ki dang wan rung tuh sha India ha ki bynta jong ka West Jaintia Hills District.
Kine ki lai ngut ki khar Bangladesh kiba la ioh ban kem ki long ar ngut ki shynrang bad kawei ka kynthei, kane la ioh ban kem ha ki bynta jong ka West Jaintia Hills District kane ka jingioh kem ka long ha ka jan miet jong ka 19/Nailar/2024.
Ha kane ka jingioh kem ia kitei ki khar Bangladesh ki shipai BSF kila ioh ban kem ruh lai ngut ki nong India kiba pynrung tuh ia kitei ki khar Bangladesh sha India, kane ka jingioh kem kala kren shai ba ki don ki briew kiba iarap ban pynrung ia ki khar Bangladesh.
Na ka liang jong ki BSF ha dien ba kila pyndep ia ki jingdon kam katkum ki kyndon ain kila aiti sha ki pulit jong ka jylla ban leh ia kaba don kam ban pynshitom ia ki katkum ka ain ia kiba wanrung tuh bad ia ki nongpynrung beain ia ki briew na kawei ka ri.
Ban pynkuynmaw ba ka seng HANM kala ai da ka jingthoh sha ka DGP ka jylla Meghalaya ban ong ba ki don kiba pynrungthuh ia ki khar Bangladesh sha India da kaba shim Pisa bad ka KSU ruh kala kren ia kane ka juh ka phang.
