Shillong, Jylliew 30: Mynta ka sngi ki shipai BSF kila ioh ban kem lai ngut ki khar Bangladesh na shnong Dangar kaba hap ha East Khasi Hills District, kiba la ioh ban kem la tip kyrteng kum u Mohibur Rehman 30 snem, u Kudus Miah 25 snem kiba dei na Sunamganj bad u Mubarak Hossain 16 snem na Sylhet.
Kine ki khar Bangladesh kila wan rung tuh sha India na ka khappud ha ka thain Dangar kaba hap ha East Khasi Hills District, ki BSF kiba la ioh ia ka jingtip kila ap ktem ha Lat Balat bad kila ioh ban bat ia kawei ka kali Maruti kaba la kit ia kine ki kharbangladesh.
Ha kane ka jingoh bat ia ki khar Bangladesh ki BSF kila ioh bat ruh iaki ar ngut ki nong India, kiba la kit ia kitei ki khar Bangladesh ha ka kali kaba ki niah bad haba la tohkit ki lai ngut ki khar Bangladesh kila phla ba ki la rung sha India da ka jingthmu ban leit sha Kashmir.
Ia kine ki khar Bangladesh kiba la ioh ban kem la aiti sha ki pulit jong ka Dangar Police Station ba kin ioh ban leh ia kaba don kam katkum ka ain, lah ban pynkynmaw ba ki pulit kila ioh ban kem ia ki khar Bangladesh na Rilbong jan Umsherpi kiba la wan kiew sha India na ka juh ka jaka ka thain Dangar.
