Shillong, Naitung 21: Ki samla pule “Air hostess” kiba shah hikai ia lade hapoh jong ka Crewlink Aviation bad Hospitality kaba don ha Laitumkhrah kila ioh ban lei tap bad pdiang burom ia ki nongwan da ka liengsuin Indigo ha Umroi, Shillong Airport.
Ka jingialang jong ki bor pyniaid katei ka jaka ai jinghikai ka long kum shibynta ban pynsngewthuh ia ki khynnah kiba la leit ban shah hikai ha kane ka kam. Kane ka long ka jingmyntoi kaba khraw na ka bynta jong ki namar kam long tang ha ka jingbatai hynrei ki ioh ia ka jinghikai.
Ka kong Golda Liza Nengnong Managing Director, kala iathuh ba ka jingwan ialam ia ki ha kane ka sngi ka long ban kin ioh jinghikai kyrpang wat la ka long tang khyndiat ruh namar ia kaei kaba ki hikai ki samla ki ioh ban pyrshang.
Haba phai sha kane ka kam la ong ba ki samla na kane ka jylla, khamtam ki Khasi ki lah bha namar ki khlain ha ka jingkren ia ka ktien phareng, kaba don kam ka long ban nang ruh ia ka ktien Hindi namar ha ki eroplene kiba her tang hapoh ka Ri don kam ia ka ktien Hindi.
Ha kine ki snem kiba mynta bun na kiba wan shah hikai ha kane ka kam Air Hostess ki samla ki long kiba tbit bha ha ka ktien Hindi ruh. Kane ka jinglah jong ki ia ka ktien Hindi bad Phreng kala pynsuk ia ki ban ioh kam ha dien ba kila pyndep ia ki jinghikai.
