Shillong, Iaiong 29: Ha ka jingialang jong ki doktor kaba la long ha Guwahati ha ka sngi Thohdieng u Dr. Rangsan Singh Thangkheiw kaba la tip kum ka ‘Northeast Healthcare Summit 2023’ u la ioh pdiang ia ka khusnam kaba la tip kum ka ‘Distinguished Career Award’ 2023.
U Dr. Rngsan u la sdang, kum u Nongpynïaid (Director), bad u Chief Gastroenterologist jong ka Supercare Hospital, Shillong. Dei hakane ka jingialang kaba la ai ia ka lad ban ithuh bad ban pyni jingsngewnguh ïa ka jingtrei minot bad ka jingkyrshan jong ki katto katne ki briew ha ka liang ka jingsumar ha ka thaiñ shatei lam mihngi.
Ki kongsan ha ka jingïalang ki la long u Shri Keshav Mahanta, u Mintri jong ka Koit ka Khiah jong ka Sorkar Assam, bad u Dr. Sapam Ranjan Singh, u Mintri jong ka Koit ka Khiah bad ka IPR jong ka Sorkar Manipur.
Kum kane ka jingïalang, la long nongkong eh ha u snem 2019, bad la saw snem mynta kane ka jingïalang ka ai ka lad ban ithuh ia ki seng ha ka koit ka khiah na Assam. Ha ka sien ba nyngkong mynta u snem, kane ka jingïalang ka la nang ïar haduh ban kynthup lang ïa baroh ki thaiñ shatei lam mihngi kaba kynthup ïa ka jylla Sikkim.
Kane ka jingïalang ka pyrshang ban ithuh bad pyni jingsngewnguh ïa ka jingtrei shitom, ka jingshakri ba pura bad ka jingrai kut jong ki seng bad ki briew ban ai sha ka tnad ka koit ka khiah ha ka thaiñ.
U Dr. R. S. Thangkhiew i la ïoh ïa kane ka khusnam na ka bynta ka jingtrei shitom bad ka jingïalam lynti ka jong i ha ka bynta ka tnad ka koit ka khiah ha ka jylla Meghalaya.
U Dr. R. S. Thangkhiew i la pyndep ïa ka jingpule MBBS na ka Assam Medical College ha u snem 1980, bad i la pyndep ïa ka MD (Medicine) jong i na ka PGIMER, ha Chandigarh ha u snem 1985.
U la long uba nyngkong eh ha ka thaiñ shatei lam mihngi (Northeast) ban long u Superspecialist ha ka Gastroenterology, ha kaba i la pyndep ïa ka DM (Gastro) jong i ha u snem 1987 na PGIMER, ha Chandigargh.
u la long ruh ba nyngkong ban wanrah bad leh ïa ka ERCP (Endoscopic Retrograde Cholangiopancreatography) kaba long ka rukom sumar kaba kynthup lang ïa ka endoscopy bad ka x-ray khnang ban lap bad ban sumar ïa katto katne ki jait jingpang jong ka biliary ne ka pancreatic ductal systems.
