Shillong, Nohprah 02: U Chief Executive Member jong ka KHADC u Bah Latiplang Kharkongor u la ong ba palat 100 tylli ki phail kiba dei na ka tnad khaii pateng kila juh na ophis bad mynta dang phah wat ha ki ophisar ban tip sha ei kine ki phail ki don.
Haba kren ha ki lad pathai khubor mynta ka sngi u la ong ba lada ym lap sha ei kine ki phail ki don ka ophis kam ban se ban thung ia ka kynhun tohkit bad ha dien kata lada ym lap ka ophis kam ban se ban ai ejahar bad ki pulit.
La ong ba ka long kaei kaei kaba sngewsih ban iohi ba ki phail kin jah na ophis, kine ki phail kiba jah ki dei ki phail ba dei ban pynthymmai ia ki Trading Laisen. Haba la wad ia ki mynta kim don ha ophis jong ka KHADC ki ophisar ki hap ban ai ia ka kaiphot sha ei kine ki phail ki don.
La iathuh ruh ba ha ka 20th Naiweing 2019, ka sngi kaba la pynhap ia ka Executive Committee, ha katei ka sngi la sei ia ka pisa jong ka KHADC T.10 klur tyngka ha ka kyrteng jong ka “Mobilization Fees” na ka liang jong kane ka EC ka wad ia kane ka jingleh ba balei la leh ha ka sngi kaba ka EC kala khyllem.
Haba jubab ia ki jingkylli u Bah latiplang u la ong ba kam juh don ka rule ban rah ia ki phail sha iing namar ki phail ki dei ban don ha ophis. Kine ki phail kiba jah na ophis baroh 100 tam ei ei ki dei tang na ka tnad Khaii pateng, la ong u Bah Latiplang Kharkongor CEM.
