Shillong,Jymmang 24: Halor ka jingjop jong ka party BJP ha kane ka MP ilekshon,u Bah John F Kharshiing u ai khublei ia ki
paidbah ka Ri India kiba la ai jingjop tang ia kawei ka Seng ka BJP ba la lam khmat da u Narendra Modi, uban sa bteng ia ka kam PM na ka bynta san snem ban lait na ki Sorkar khleh khaw lang wat hapdeng ka jingbun ki jaidbynriew hapoh kane ka Ri India.
Na ki rukom jop ha kane ka Lok Sabha Elections 2019 bad ki Dak kiba mih ha baroh kawei ka India ka paw shai ba baroh ki seng sain pyrthei ha ka national bad regional kin hap puson bha ban sngewthuh ia ka jingsngew u paidbah kiba jied da kuwei ha ka election jylla bad da kawei pat ha ka National Election.
Ki phang jingialap election ki dei ban long kiba shai khnang ba ki paidbah kin sngewthuh. Katba ka seng BJP ka la long kaba iohnong na ka jingbymdon nongialam uban nep reng uba biang uban pyrshah ia u Shri. Narendra Modi, ha ka liang pyrshah, khamtam haba mih bun ngut ki nongialam pyrshah kiba pynpaw ialade kum kiba kwah ban long PM.
Baroh ki seng ha ka liang pyrshah, ka kynhun ba ialam da ka Indian National Congress bad kiwei ki kynhun ba ialam da ka TMC, ka MGC (SP+BSP+RLD), TDP, RJD, baroh kine ki la liem kput bad ka jingkylli ka long hato kine kin dang lah mo ban ieng biang. Kitei ki Seng kin hap sngewthuh ba ki paidbah ki la dei ban pynshai ki dei ban sei lupa ia u kyrtong nongialam ban long PM la kumno kumno are snem shuwa ka election.
Ha kawei ka liang pat ki seng regional party ruh ki don ha ki jylla bad ki don la ka Jong ka bor namar ka jingthrang u paidbah ban pynpaw ban pynneh ia ka dur ka Riti jong ka jaidbynriew bad kane ka paw lyngba ka jingjop ka DMK ha Tamil Nadu, ka YSRCP ha Andhra Pradesh, ka INC, Akali ha Punjab ka TMC ha west Bengal, ki Left or INC ha Kerala kiba la lah ban pynsangeh ia ka jingjop ka jingsam ka BJP ha baroh kawei ka Ri India.
Baroh kine ki Seng kynthup ka INC, TMC, TDP, SP, BSP, ki la pynbna ba ia u kyrtong PM kin sa pynbna hadien ba la dep niew vote hynrei kumba paw mynta hadien ba la dep niew vote ki paidbah ki la kyntait ia katei ka rukom pyrkhat namar ki paidbah ki kwah ban shai mano na pdeng Jong ki ban long u nongialam ka Ri India.
Kumta, ka paw shai ba kitei ki Seng baroh kin hap thaw lad ban sei da ki nongialam kiba thymmai, ia kaba Kan nym long kaba suk ban leh kumta namar ha kiba bun ki Seng kim don synshar paidbah kaba hok bun ki Seng ki la kylla long ki Seng kiba synshar beit tang na ki Katto katne ki longiing. Haba mih kum kine ki jingshah rem kiba bat ia ki Kam ki dei ban shim ia ka jingkitkhlieh.
Ka juk jied PM ne CM da ka High Command ka la kut namar ka jingialeh election ka la kylla dur ha ka nongrim ba ki paidbah ki la kwah lupa ban tip ia u nongialam ne kyrtong PM ne CM.
Kumta, la donkam kyrkieh ban ioh ia ka jingpynbeit thymmai electoral reforms ia ki rukom trei ki seng sain pyrthei ba kin lah ban pynkhreh ia lade ia Kum kine ki jingialeh election “presidential style contest” . ong u Bah John F Kharshiing.
