Shillong, Naitung 27: Ka Mohun Bagan Super Giant ka la sdang ban ïada ïa ka burom lahduh jong ka ha ka Durand Cup da ka namjop ïa ka Downtown Heroes FC ha ka sngi plie pyrda ïa ka 133rd Indian Oil Durand Cup kaba la pynïalehkai ha Vivekananda Yuba Bharti Krirangan. ïa kane ka namtam la thep da u Suhail Bhat.
Haba bishar ïa ka jingïakhun lah ban kdew ba ka kynhun na Kashmir ka la lah ban tehlakam bad ïalehkai bha bad ki la don ruh ki kabu na u Mohammad Inam kiba la pynsmiej ïa u rangapkol ka Mohun Bagan- u Syed Hussain Bukhari tang hadien 10 minit ba la ïaid ka por jong ka kylla step.
Ki la don ruh katto katne ki kabu ksiar na ka ‘The Mariners’ kiba la bakla noh bad khlem shym la lah ban pynurlong. U Aafreen Parray u la ïalehkai bha ha liang ba ïeng.
U Aafreen u la ialehkai bha ha kaba la la pynsmiej shikatdei ïa ki bak ka Mohun Bagan hynrei ka la duna ki nongthep kol bad kine ki kabu ki la shu sepei.
Kabu ksiar kaba paka ka la wan na u Darius Snorton ha ka por ba u ïakynduh para marwei bad u rangapkol hynrei lait sharud ka bol kaba u la shut.
Ka Mohun Bagan ka la sdang ïalehkai bha ha ka kylla miet lyngba ka jingïatreilang u Taison Singh, u Suhail Bhat bad u Salahudheen Adnan ki la ïoh jaka ban wanrah jingma ïa ka Downtown Heroes.
Ka kynhun ka la jan ïoh pynkhihjar ha ka 60 minit, hynrei phewse kane ka kabu kam shym la urlong satia. Ka la shimpor ïa ka kynhun haduh ka 73 minit ban ïoh pynïakhlad ïa ka jingïakhaid na ka kol u Suhail Bhat.
Ka Downtown Heroes ka la pyrshang katba lah ban pynïakhaid hynrei kam shym la lah ban pynpra ïa ka kut ba skhem jong ka liang pyrshah Mohun Bagan kiba pyn skhem triang hadien ban pynthikna ïa ka kynhun ban khur ïa ka jingjop. Ha kaba kut, u Suhail Bhat u la shah jied kum u rangïalehkai ba kynsai ha kane ka jingïakhun.
