Shillong, Jylliew 02: Mynta ka sngi la pynlong ia ka jingniew vote iaka MLA elekshon hapoh ka jylla Arunachal Pradesh ha baroh 60 tylli ki konstitwensi ha kaba ka BJP kala jop 46 ngut ki MLA ha kaba kala ioh ban synshar biang ha katei ka jylla.
Ka National People’s Party (NPP) ka dei ka paralok jong ka party BJP kala wan ba ar ha ka jingjop bun ki MLA ha kaba la jop san ngut ki MLA. Ka NPP kala pynieng 29 ngut ki kyrtong ha ka iing dorbar ba 60 ngut.
Ki konstitwensi kaba kila jop ki long na ka Tawang -2 bala jop da u Namgey Tsering, na Liromoba-27 jop da u Pesi Jilen, na Pasighat East-38 la jop da u Tapi Darang, Mariyang-40 jop da u Oni Panyang bad na Longding Pumao la jop da u Thangwang Wangham.
Kitei ki san ngut ki MLA jong ka NPP kila pynrem ia ki kyrtong jong ka BJP ha baroh san tylli ki konstitwensi, kiwei ki party kiba la jop ha kane ka elekshon ki long, ka party NCP kala jop 3 ngut, ka party PPA 2 ngut, ka Congress 1 bad ki kyrtong shimet kiba la jop ki don 3 ngut.
