Ampati, Naitung 12: U MLA jong ka 54-Mahendraganj (ST) Legislative Assembly Constituency, u Sanjay A. Sangma, mynta ka sngi u la leit kynduh iaki lanot ba shah ktah ha ka jingshlei um na ka daw jong ka jingjur u slap ha ka shnong Balughat kaba hap ha South West Garo Hills distrik.U Sangma u la leit kynduh iaki longiing ba shah ktah, da kaba iarap ia ka jingjulor baroh bad pyn thikna ban kyrshan iaki katba lah. U la iarap da kaba ai pisa sha kito ki lanot kum ka jingiarap mar mar iaki hadien katei ka jingshem jong ki ha ka jingshlei um.
Watla ym ioh khubor halor ka jingiap briew, hynrei na kane ka jingshlei um, kala pyn julor iaki jingthung jingtep baroh, ha kaba la lam ruh sha ka jingbym ioh bam kito ki longiing ha katei ka jaka.
U Sangma u la pynpaw ka jingsngew halor katei ka jingjia bad kyrpad iaki nongshong shnong ba kin long kiba husiar ha kum kane ka por slap. U la kular ruh ba ki jingeh jong ki longiing kiba shah ktah yn rah sha ki bor kiba dei peit ban ioh ai ka jingiarap bad ki lad jingpynkylla kiba biang.
