Shillong, Iaiong 09: Ki nongrep kiba don ha ki thain Lyngkien, Mawphlang, Mawngap, Marbisu bad ki jaka ba marjan kila duh ia ki jingthung ha ka jinglynshop jong u phria mynta ka sngi ha kitei ki thain.
Ka jingduh jong ki nongrep kaba la jubor eh dei u phan namar ha katei ka thain ki ba bun ki nongrep ki dei kiba rep ia u phan bad ha kane ka por ka dei kaba u dang mih shylluid bad kane ka jingjur ka jinghap phria mynta ka sngi kala wanrah ia ka jingduh kaba khraw ia ki nongrep.
Haba kren bad u SP News Agency ki briew kiba wan na ki thain Mawsynram bad ki thain Mawkyrwat kila iathuh ba ka jingjur jong u phria ka long kaba la palat haduh ba la tap lut da u phria ia ka surok bad ki kali kim nud shuh ban iaid naduh Mawphlang sha duh Marbisu.
