Shillongm Nailar 12: U General Secretary jong ka All India Regional Rural Bank Employees Association u S V Ready u la ong ba ka jingdawa jong ka seng na ki bor pyniaid jong ka Bank haba thung kam dei ban phah da ki briew jong kato ka jylla namar ka jingiasngewthuh ia ka ktien.
Haba kren ha ki lad pathai khubor mynta ka sngi ha Shillong haba wan ban ia shim bynta ha ka jingialang jong ka Meghalaya Rural bank, u la ong ba kum ka seng kila dawa ia kane la slem bha na ki bor pyniaid hynrei mynta kala don ka jingleh klumar ha kaba la phah da ki briew ki bym dei na ka jylla kaba lah ban ia sngewthuh ia ka ktien bad kane ka buh jingeh ia ki paidbah.
La iathuh ia ka eksamin thung kam hapoh jong ka Rural Bank ha ka Ri Baroh kawei la pynlong tang kawei ka eksamin ia kane kim don jingpyrshah ei ei hynrei kaba ki pyrshah ka long ha ka por ba thung ia ki briew ba kim dei ban phah da ki briew ki bym dei na ka jylla kaba ki wan, la ong ba lada dei ha Meghalaya dei ban thung da ki briew na Meghalaya bad kane ka dei ban long ha kiwei ki jylla ruh kum juh.
La iathuh shisnem mynshuwa kala don ka jingjia ha kaba ki bor ba pyniaid ia ka Rural Bank ha ka por ba ki thungkam kila phah ia ki briew ki bym dei na ka juh ka jylla bad kane kala wanrah jngeh ia ki paidbah. U la ong ba kane kala jia ruh hapoh kane ka jylla Meghalaya bad kane ka juh ka jingjia kala jia ha kiwei ki jylla ruh.
Na ka liang jong ka seng ka dawa na ki bor pyniaid jong ka Rural Bank ba nangne sha khmat lada don ka jingthung kam dei ban thung ia ki briew kiba dei na ka juh ka jylla namar kiba bun ki shnat jong ka Rural Bank ki dei sha nongkyndong lada ym ia sngewthuh ka ktien ka long kaba eh.
La iathuh ruh ba ha Meghalaya ki skhim sorkar kiba dei bad ki paidbah 70% ka iaid lynba ka Meghalaya Rural bank. Wat la ka don ka jingdawa ban plie shuh ia ki shnat trei kam jong ka Bank, ka jingeh ka long ba ka RBI kala buh ka kyndon ba hapoh shisnem ka dei ban ioh nong ka Bank bad ha ka juh ka por ki bor pyniaid ki pynduna ia ki nongtrei kane ka jingeh kaba ki ia kynduh.
