Shillong, Iaiong 25: U general Secretary jong ka seng All Khasi Hills A’Chik Federation (AKHAF) u John D Sangma mynta ka sngi u la ong ba ka seng kan ia treilang bad ka CoMSO na ka bynta ban dawa na ka sorkar ban pyntrei kam noh ia ka Inner Line Permit ha kane ka jylla Meghalaya.
Haba kren ha ki lad pathai khubor mynta ka sngi ha Shillong Club, na ka liang jong u Sangma u la ong ba la don kam ban pyntrei kam noh mardor ia ka ILP ha kane ka jylla Meghalaya, u la ong ba kane ka sorkar kam shym la shim khia ia kane ka kam namar kane ka paw na ka jingkren jong u myntri rangbah ka jylla u Conrad K Sangma bad u Deputy Chief Minister ka jylla u Bah Prestone Tynsong ka iapher.
La iathuh ruh ba kane ka seng ka kwah ban don ia ka jingialong kawei hapdeng ki Khasi, Jaintia bad Garo, na ka liang jong ki Garo kiba don ha Khasi bad Jaintia kim don jingtip ei ei ha kaba ia dei bad ka jingdawa ia ka Garo Land, ia ki kmie ieit pa ieit, ki kmie ki kpa bad ma ki ruh la kha hangne bad kin sah hi hangne, ki don jingtip ei ei ia kata ka Garo Land, la ong u John D Sangma.
La iathuh ruh ba la thaw ia kane ka seng ka long ban peit kyrpang ia ki shnong kiba ha khappud kiba dang sah dien ha duh katta katta la ka long ha ki lad jingsumar, ki jaka pule ki surok bad kiwei kiwei ki jingdon kam jong ki paidbah. Kane ka seng kan leit ban dawa na ka sorkar ba ka dei ban peit ia ki nongkyndong sha kaei ka pisa kaba la mang ka buh.
