Shillong, Jylliew 12: Ka bai shong kali kan long katkum ka “Meter System” ia ki Local Taxi bad ia ki Autorickshaw, kane ka long katkum ka ain jong ka sorkar pdeng Motor Vehicle Act, ia kane la phah sha ka Transport Department ba kan leh ia kaba don kam, la ong u Symbut Myntri Rangbah ka jylla u bah Prestone Tynsong.
Haba kren ha ki lat pathai khubor ha kaba ia dei bad ki rai jong ka kabinet kaba la shong pyrkhat kam mynta ka sngi, la iathuh ia ka bai Taxi ka sorkar kam shym la pynkiew kala pynneh kumjuh namar ia kane dang pynkiew ha u bnai Kyllalyngkot mynta u snem 2020.
La batai ba ka bai shong Taxi ka long T.26 tyngka ha ka shi kilometre bad ha man ka shikilo meter kaba tam pat kan long 13 tyngka. La ong ba kane ka jingshong taxi kaba long mynta ka long beain namar kam don kata ka rukom shim bai kali ba kan long ha ka “Share System” ha ka ain kam don, long u Bah Tynsong.
Ia ki Autorickshaw ruh ka kabinet ka dang pynneh ia ka juh ka dor kata ka long T.14 tyngka ha ka shikilo meter bad ha dien ka shikilo meter ka bai shong Autorickshaw kan long T. 6 tyngka. Haba ia dei bad ka jingpyndon kam kam ia ki meter ha ki Local Taxi bad Autorickshaw la aiti sha ka Transport Department ba kan peit ia kane ka kam.
Ia ka bai kali ban kit mar mata, kum juh ia ki Bus ka kabinet kala shim ia ka rai ban pynkiew na ka T.1.05 tyngka ha ka shikilo meter sha ka T.1.80 tyngka man ka shi kilo meter ha ka jylla baroh kawei. Ia ki kali kamai kiba kit briew hynniew ngut haduh 12 ngut kabai kali la pynkiew na ka T.2.05 sha ka T.3.60 tyngka.
Ha kane ka jingialang ka kabinet la pdiang ruh ia ka Draft Motor Accident Tribunal katkum ka jingbthah jong ka iing bishar ba ha khliehduh jong ka Ri India ka Supreme Court bad jong ka Delhi High Court.
Ban plie lad ia kano kano ka kam kaba thymmai ia kaba ym pat don bal eh, lada don ki riew shimet ne ki Kompeni ki lah ban phah ia ka DPR sha kano kano ka tnad sorkar katkum ka skhim ka kabinet kala pdiang ia ka “Switch Challenge Method”.
Ka kabinet kala pdiang ruh ia ka rai ban aiti ia ka jaka jong ka tnad Urban Affair bad jong ka GAD kaba ka long 64.34 akar sha ka tnad sport bad Youth Affair na ka bynta ban shna ia ka Games village ban pynkhreh ia ka National Games kaba 39th ha kane ka jylla Meghalaya.
