Shillong, Nohprah 17: U General Secretary jong ka Meghalaya Pradesh Youth Congress (MPYC) u bah Fernandes Savio Dkhar mynta ka sngi u la on ba ka Confederation of Meghalaya Social Organisation (CoMSO) ka dei ban trei kum ka kynhun seng bhalang kamd ei ban long kum ka nongai ktien jong ka sorkar Meghalaya Democratic Alliance(MDA).
Haba kren ha ki lat pathai khubor mynta ka sngi ha Congress Bhavan, u bah Fernandes u la ong ba ka jingkylli jong ka CoMSO ia ki nongialam ka seng Congress ba ki artatien ha kaba ia dei bad ka jingkyrshan ia ka jingdawa ILP ha ka jylla.
U tei u nongialam jong ka seng samla jong ka seng Congress u la ong ba ka jingbym kwah ka Congress ia ka ILP ha kaba mynshuwa ka long ba ka jylla kala don ia ka Land Transfer Act, ia ki District kumta la don kam tang ia ka ain na ka jylla ban ia da ia ka jingwan ki bar jylla.
Hynrei ka por ka kylla bad ka wan noh ka CAB ia kaba mynta kala kylla CAA, dei halor kane ka nongrim ba ka seng Congress kala ai ka jingkyrshan kaba pura ia ka rai jong ka iing dorbar ban dawa ia ka ILP, ka CoMSO kam dei ban peit khmat ia u nongialam ka liang pyrshah namar ka nongrim jong ka seng ka long shai ba ki kwah ia ka ILP ha ka jylla Meghalaya.
Ha kaba ia dei bad ka jingkynthoh ka NPP Youth Wing ia ka party Congress, na ka liang jong ka MPYC ka kwah ban kylli hato ym long shuh ban kdew ia ka jingtrei kam bakla jong kane ka sorkar MDA, na ka liang jong ka Congress kan nym sngap jar kan kren bad iai kren ba ki paidbah kin tip ia ka jingshisha.
U Nongialam ka Congress u la kynnoh ba dei ka party NPP kaba la shet kylla ia u paidbah ha kaba u president ka party u Conrad K Sangma u la ong ba lada pdiang ia ka CAB, ka NPP kan wengnoh na ka NDA bad na ka NEDA, hynrei ka Agatha Sangma ka MP jong ka NPP ka kyrshan ia ka CAB hapoh parliament.
Ha kane ka sorkar MDA kaba mynta ki nongtrei sorkar kim ioh ia ka arrear, ki nongtrei MeECL, MCCL, nonghikai SSA kiba khlem ioh ia ka tulop jong ki, ka jingong ki nongialam ka NPP Youth wing ba ki MLA ki dei ban trei ha ki konstitwensi na ka liang jong u nongialam ka MPYC u la ong ba ki MLA kim dei tang jong ka konstitwensi hynrei dei jong ka jylla ruh baroh kawei.
