Shillong, Nailur 06: U MLA jong ka seng Congress u Zenith M Sangma u la ong ba ka party Congress ka dawa ba ia ki jingkynnoh bamsap hapoh jong ka Meghalaya Energy Cooperation Limited (MeECL) dei ban phah tohkit ha ka Central Bureau Investigation (CBI).
Haba ia dei bad ka jingpynbna u myntri rangbah ka jylla ha ka 28th Jylliew 2021 ba la thung ia ka kynhun tohkit ban khlieh da u nongbishar ka dei tang ka jingtap eit miaw, u la kylli ruh balei haduh mynta kane ka jingtohkit kam pat sdang.
U tei u nongialam jong ka party Congress u la kynnoh ba kane ka sorkar MDA ka kwah ban pyniaid ia ka sorkar kumba pyniaid ia ki kompeni, kane ka sorkar kala phah thew ia ki jaka jong ka MeECL, kiba don ha Tura, Umiam, Byrnihat na ka bytna ban aiti ia ki sha ki riew shimet ha ka nongrim ba hana kine ki jaka ki shusah shrah.
U Zenith u la kynnoh ba ha kane ka sorkar MDA kaba mytna kala mih shibun ki jingkynnoh ba kala don ka jingbamsap, la dei ia u u dewiong, khaw, ha MeECL dei, tnad khlaw, ka tnad lum khajna ia kiba la kynnoh pyrshah ia kane ka sorkar MDA.
Kane ka sorkar ha ka kyrteng jong ka ki kam jngohkai pyrthei, ka kwah ban aiti ia kine ki jaka jong ka MeECL sha ki reiwshimet bad kum ba kala paw ha ki lat ptahi khubor ba u mytnri rangbah un sa shim noh ia ka tnad bor ding bad aiti ia ka tnad jngohkai pyrthei ha u James K Sangma, kaei kane la kylli u Zenith.
U MLA jong ka seng Congress u Zenith u la ong ba ka sorkar ka dei ban sngeh ia kane ka jingpyndon kam bakla ka bor, ia map lem ia ka jylla, ha ka juh ka por u la ong ba lada kane ka sorkar kam sngap na ka liang jong ka Congress kam base ban leit tied ia ka jingkhang jong ka iing bishar.
