Shillong, Nohprah 16: Ha kaba nyngkong eh, ka don ka jingbym- shai ha kane ka jingkhot ia ka All Party meeting ban ia syllok halor ki kam ba iadei bad ki kam pynbeit ia u pud u sam jong ka jylla da ka sorkar MDA.
“ Lada ka Seng Congress ka khlem ioh shiti ban shah khot sha ka jingialang kumno ngin ioh jingtip ban shim bynta ruh, khlem pynpoi ia ki shithi. kane kam dei ka sien nyngkong ba ki ne ki jingiaid, lait ia ka seng Congress na kine ki kam ba kyrkieh bad donkam shibun eh”, ong ka nongialam ka CLP Dr. Amapreen Lyngdoh.
Ha ka jingialang Regional Committee ba lah khot ha Langpih dangshen u MLA bad MDC ki ba long dkhot ki khlem ioh shithi pyntip ban leit sha ka jingialang. Hynrei ki baroh arngut ki shu leit beit bad rung jubor sha ka meeting.
Ka long ka ba bakla ban paw pat sha u paidbah ba ka seng Congress ka khlem wan sha ka jingialang. Ngi ka Seng Congress ngi pynpaw ka jingsngew lyngngoh bad bitar hakhmat ka sorkar MDA ba kane ka niew bein bad kyntait ia ka jingiajingmut na ka liang ka seng halor kane ka kam iap – kam im khlem burom lem ne sngap lem.
“Ngi dawa mardor ia ka jingai jingpynshai na u Myntri Rangbah ia kum kane ka jingbakla bad ngi dawa ba ka Sorkar Jylla kan bsut ia kane ka jingkren jong ngi ha ka shithi ba ngin sa ai hakhmat jong u lashai ka 17/12/21 kum shi bynta jong ki minutes jong ka jingialang ba ki lah pynlong hynnn ka sngi ka 15/12/21”, dawa ka Dr. Ampareen
Shuh shuh, ka Congress ka dawa ia ka MDA ba kan khot biang ka ka All Party meeting ha kawei pat ka por ba nym shim kano kano ka rai halor ki kam ba iadei bad ka jingpynbeit pud bad sam, khlem da don ka jingiasyllok ba pura bad ngi ka liang pyrshah jong ka dorbar thawain jong ka Meghalaya Legislative Assembly.
Ka party kan sa thoh sha u lamphang ka ing dorbar thawain ban iasaid lem na ka bynta jong ngi kiba don hok don bynta ha kum kane ka kam hima- sima bad sain pyrthei bad ba la ai bor da ki paidbah ba la jied ia ngi sha katei ka Assembly.
“Ka party Congress kan bud dien ia kane ka kam kyntang bad lada iaid lait na ngi ngin rah ia kane ka kam sha ka rynsan u paidbah. Ngin ap ia ka jubab u Myntri Rangbah ka jylla jong ngi, bad ngi khim lynti ba ki kam ki jam kin iaid beit, iaid ryntih ban ioh myntoi lang baroh, khamtam ma ngi ki nongkynti ka Bri U Hynniew Trep, Hynniew Skum, u ba hap kam kongsan ha ka jingiakajia pud, kajia sam ha kane ka jylla jong ngi”, ong ka Dr. Ampareen.
