Shillong, Risaw 04: U Bah Manstudy Nongrem Chairman jong ka “Consultative Committee” kaba la thung kyrpang da ka Executive Committee jong ka KHADC ban peit bniah halor ka Khasi Social Customs Lineage (Amendment Bills) Bill 2018 kila pyndep mynta ka sngi bad ia ka kaiphot kin sa ai noh sha ka Executive Committee ha kine ki sngi.
Haba kren ha ki nongthoh khubor ha dien ka jingialang u Bah Nongrem, u la ong ba ka kaiphot kaba ka kene ka committee kan ai sha ka EC, ha long halor ka nongrim ba ia ka khasi kaba ioh briew da kiwei pat ki jaidbynriew kin duh nong ia ka jingioh kum ki khasi, u la kren shai ba ia ka jingiashong kha yn nym khang kata ka dei ka jingiamon jong ki briew.
Kane ka Kommittee, kala ia shong pyrkhat ban bishar bniah na baroh ki liang, na ka liang jong ka ain, na ka liang ka riti dustur jong ka jaidbynriew khasi bad ia ki jingleh khyllah da ki katta katne yn nym iew ba ka dei ka Dustur. La ong ba un nym lah ban batai ia kaei kaba ki rai hapoh kane ka kommittee namar ia ka kaiphot ki hap ban ai sha ka EC.
Na ka liang jong u Chairman u la ong ba na ka liang jong ka kommittee kala dep ban pynbit pynbiang ia ki jingai jingmut ha ka dur jong ka bill. Ka phang pdeng jong kane ka jingai jingmut hi ka long ba kino kino ki khasi ki baioh briew da ki bym dei khasi kin duh noh ia ka jingioh kum ki khasi.
