Shillong Rymphang 17: Ka Da Dorbar Shnong Lumshyiap mynta ka sngi ka la pynlong ia ka rynsan ban iatainia ia ki nongrim jong baroh ki kyrtong jong ka 14th Pynthorumkhrah konstiwensi ba ki ieng ban iakhun ia kane ka ilekshon sha Iing Dorbar Thawain ka jylla.
Ha kane ka sngi ki kyrtong kiba la wan ban iashim bynta ki kynthup u bah Pynshngain N SSyiem, u bah Rocky Hek, u bah Mayborn Lyngdoh, u bah Samborlang Diengdoh bad u bah Jubanlak Kharbikhiew.
Haba kren ha kane ka sngi ki kyrtong ki la pynksan ia la ka jong ka nia bad ka nongrim ba ki ieng ban iakhun ia kane ka ilekshon MLA,2023.
U bah Rocky Hek haba ieng ha ka rynsan u la ong ba ka daw ba pynlong ia u ban ieng ban iakhun pyrshah ia ka ilekshon MLA ka long ba um dei ban ieng pyrshah bad la u Kni (Bah AL Hek) hynrei u ieng pyrshah ia ka polisi treikam jong u.
” Nga don ka thong bad ka jingiohi jong nga ha kane ka shnong ka thaw, nga sngewkmen ba ka NPP ka shah khot ki High Level. Une u High Level u la wanrah ia kawei ka Ambulance kaba 25 snem ym pat don ha kane ka shnong bad ia ka madan phutbol.” ong u bah Rocky Hek.
U bah Rocky u la ong ba la iakren ban wanrah ia ka Multi purpose Market bad ladep mang T.1 klur tam na bynta kane bad T.25 lak ladep ioh ia ka Work Order bad kane ka la don lypa ha ka kti jong u.
” Une u High Level un wanrah ia ka roi ka par ym ban shong kyllain kti. Kane kadei ka Below Poverty Line (BPL) konstiwensi hynrei haduh mynta ym don ba bun ban don ia kane ka BLP. Shaei jah kita ki nongmihkhmat hynrei la shu pynksan,” ong u bah Rocky bad bynrap, ” Ailad ianga ban ngan leh politik bad ki 58 ngut ki MLA ha Iing Dorbar Thawain, Kumno ba ngan leit ban tah umphniang ia u Myntri Rangbah ka jylla na bynta ban wanrah ia ka roi ka par ha kane ka konstiwensi. Ngi ki High Level ka NPP ngin wanrah ia ka roi ka par.”
U bah PN Syiem u kyrtong ka Congress u la ong ba kane ka ilekshon kadei kaba kongsan bad kham kyrpang. Ha shwa ban long Politishian dei ban tip shwa ia ka Histori jong u Khasi.
U la batai bniah halor ka Standstill Agreement ba la iasoi hapdeng u Syiem Mylliem bad ka sorkar pdeng, ka Instrument of Accession & Annexed Agreement ba la kdew ba ym bit ban ktah ia ka um ka wah, ka dustur, ka jinglong kyrpang, ki marpoh khyndew bad ka jingngeit niam bad ka Sixth Schedule ban iada ia ka jinglong kyrpang katkum ka bishar ka synshar jong u Khasi.
” Kaba sngewsih ka long ba ngi ioh Jylla 1972, hynrei la pyntlot bor noh ia ka District Council da kaba wanrah ia ka Para 12 AA. Kaba sngewsih ka long ba ia ki khyndew ka shyiap, ki marpoh Khyndew la ngat ha ka MMDR Act,1957 jong ka ri India, ” ong u bah Pynshngain.
La ong ba u Tirot SIng bad u Kiang Nangbah ki pyndonkam da u Ryntieh bad u Khnam bad ki ain kiba Khlain kidei u Ryntieh bad u khnam na bynta ka ri Khasi ha kane ka jylla.
U la ong ba kumba long mynta ka Iing Dorbar Thawain ka la kylla long ka Iing Dorbar Thaw spah.
la kular ba lada u poi sha bor, ka thong jong u ka long ban Ieng ka Lumshyiap MArket Complex kan ieng bad ka madan ruh kadei ban don na bynta ki paidbah ka lumshyiap, ka Indoor sports bad ka College ban phah skul ki longiing baduk bad ki lynti syngkein ruh kidei ban biang ki CCTv ki bording ha surok, Ka Rehabilitation Centre.
U kyrtong ka VPP u bah Mayborn Lyngdoh u la ong, ba ka sorkar India ka la ai ia ka hok ban leit skul ka Right to Education Act hynrei haduh mynta ym pat don ban pyntreikam ha kane ka jylla.
La ong ba ki samla kim ioh ia ka State Scholarship skhim bad ka National Scholarship Skhim hynrei bun ki khynnah kim ioh bad bun ki aplai namar ba ki pynjynar khnang ban aplai ia akne ka Scholarship Skhim.
U bah Mayborn u la ong ba kane ka sorkar ka shu pynlut kai ia ka pisa haduh T.14 klur tang ha ki Festival. Kane ka jingpynlut ka sorkar ka long ban suk ban tuh na kine ki tamasa.
Shuh shuh u bah Mayborn u la ong ba ka CAA Act la pyntreikam ha u 2019. ” Hynrei haba ngi peit ia ki jingma kam dei ba wan tang ka sorkar BJP hynrei ka wan na ka sorkar Congress mynshwa . Haba iadei bad u Pud u sam ruh, ha u snem 1972 haba ioh ia ka jylla, ka Block-1 bad Block-2 ha Karbi Anglong la ai 356 tylli ki shnong sha Assam bad ia kane ruh ym dei ba la pynkulmar da ka sorkar NPP hynrei kadei ka sorkar Congress,”
U kyrtong shimet u bah Samborlang Diengdoh, u la ong ba ka jingieng jong u ban iakhun ia kane ka ielkshon ka long namar ba u sngew ba la skhem ki paia jong u.
” Nga ieng ban iakhun ia ka ilekshon kadei namar ba nga la sngew skhem ki kjat bad nga la sngewskhem ba ngan shakri ia ki paidbah. Katba ka kpoh nga ka dang thylli ngam kwah ba shkari ia ki paidbah bad ngam kwah ba ngan shah kynthoh hadien ba nga bam ia ka pisa jong ki paidbah ka Pynthorumkhrah,” ong u bah Samborlang.
” Lada nga wan ha ka bor, T.40 lak ha ka shi snem ngan ai ia kawei ka shnong ha ka Pynthorumkhrah konstiwensi lyngba ka MLA skhim,” u la ong.
U kyrtong shimet u bah Jubanlak Kharbhikhiew, u la ong ba ka nongrim ba u ieng ban iakhun ia ka ilekshon ka long ban pyni lynti ia ki samla, la iohi ruh ia ki jingma kaba ap ia ka lawei ha ka jingkyrduh kam kyrduh jam. “Hangne ha Pynthorumkhrah Konstiwensi ki dang don bun bah ki longiing kiba duk hynrei ngam lah ban iarap ia ki namar ba ngim don ha ka kyrdan ba biang hynrei nga kular ba lada wan ngan leh shibun ia ki samla pule bad kiwei de ki jingdonkam kum ka Iew ha Lumshyiap bad ka Sports Comples,” u la ong.
