Shillong, Kyllalyngkot 05: “ ka dei ka pisa paidbah, kam lei lei, bret kai ka sorkar palat klur ha ka iew Mawiong” kane ka dei ka jingkynthoh jong ki nongrep phan kiba dei na kane ka thain rilum khasi, ha kaba ia dei bad ka Cold Storage kaba la plié ha Mawiong ha u snem 2001.
Haba u SP News Agency u la leit ban peit ia kane ka jaka kaba la shyna da ka sorkar ban buh ia ki mar rep kiba pyud kum u phan ki jhur lada ki shah khniot ha ki nongkhaii ka la sah mynta tang ka khongrung suda namar ki kor kibor kiba don ha kane ka jaka ki la sirang lut namar ba ka sorkar kam shym la pyndon kam ia ka.
Ka jingpynlut jong ka sorkar na ka bynta kane ka cold storage ha Mawiong ka long palat klur tyngka ban tei ia ka hynrei ym shym la pyndon kam ia ka, na ka liang jong ka sorkar ruh kam shym la don kano kano ka jingpybha ia kane ka jaka bad mynta ki kor ki bor baroh ki la sarang lut khoit.
Ia kane ka jaka buh ia ki marrep la plié da u myntri rangbah barim ka jylla ba la bam kwai ha dwar u blei da ka jingthmu ba iada ia ki nongrep na ka jingshah khniot bein ha ki nongkhaii kiba buh ia ka dor katba ki mon. Ka jingthmu jong kane ka jaka ka long haba hiar ka dor jong ki marrep ki nongrep ki lah ban buh ha kane ka jaka bad dei pat ia ki ha kawei ka sngi.
Kumba ka long mynta ki nongrep kiba die ia ki jhur kijhep ki jong ki ha iewduh ki hap ban die ia ka mar rep jong ki katba ki buh dor ki nongrep, kane kam dei tang ia u jhur hynrei wat ia u phan ruh kum juh ki nongrep haba ki leit ban die ia u phan ha iew mawiong ki hap ban die tang ban lait ka sah miet namar ym don ja kaban buh ia ki.(SP News)
