Shillong, Jymmang 13: Ka Dong Ladmeri kaba don ha surobah ka Shillong-Nongstoin, ka la khring ia ki nongleit nongwan namar ba nalor kiwei ki jingdie ba ju die, ka don ka mar kaba kham pher bad kata ka dei ka Mula.
Hangne ki jait mula kiba pher bapher, kila wan poi na kylleng ki bynta ka West Khasi Hills, Eastern West Khasi bad kumjuh na Ri Bhoi. Ki mula ki dei ki jingshna kiba la mih hi na kane ka ri Khasi, ym kum kiwei kiba wanrah nabar.
Ki nongshong shnong ka Dong Ladmeri, kila sdang nyngkong ban buh dukan ha ka por ba wan u Covid-19, bad mynta ka la nang kham biang hadien ba ki briew kila nang iohi bad nang ioh jingtip shuh khamtam haba ki donkam ban thied ia ki mula.
Ki mula ki don kiba la shna ban shong ki khynnah, kumjuh ia ki rangbah ruh bad la thain da ki siej bad sop da ka snieh, khnang ba kin pynsngad bad pynsngew tynnad haba ki briew ki shong.
Ha ka jingiakren bad iwei na ki nongshong dukan, ila iathuh ba ym tang ki briew na kane ka jylla, kiba wan thied mula na katei ka jaka, hynrei ki don ruh kiba nabar jylla, bad wat kiba nabar ri, haba ki wan iaid lynti, ki ieng ban peit bad thied ia ki mula.
Watla ki mula ki kham rem ka dor ban ianujor bad kiba shna da ki plastic, hynrei ka don ka jingmyntoi namar ba kim pynsniew ia ka mariang bad ki kham iadei ha ka jingkoit jingkhiah, ym kum ki plastic kiba la ktah ia ka mariang.
