Shillong, January 27: Ka election commission jong ka Ri India ka tip ba ki nong India kiba shong ba sah ha khappud bad ka Bangladesh kiba hap hapoh jong ka Bholaganj Constituency kin ioh ban thep vote. Kine ki jaid bynriew ki kynthup ia ki Garo, Hajong, Mendai, Kacahri wat la ki la sah ha kine ki jaka la bun bun snem kim shym la ioh ia ka lad ba kin thep vote.
Na ka liang jong kitei ki jaid bynriew na ka por sha ka por ki la pyrshang ban ioh pynrung ia ka kyrteng jong ki ha ka electoral roll ba kin ioh ban pyndon kam ia ka hok jong ki ban jied ia u nongmih khmat hynrei haduh mynta kim ioh namar ba la shah khang ha kiba bun ki kynhun.
Mynta sa tang shibnai ka la election MLA ban jied ia ki nongmih khmat sha ka iing dorbar thawain jong ka jylla ka la poi, hynrei kine ki briew wat hapdeng ka jingpyrshah ka jong ki kim shym la lah ban ioh ia ka lad ba kin rung kyrteng ha ka electoral roll.
Katkum ki jingtip kiba la lah ban ioh la ong ba bun na kine ki briew ki la dep ban thep ruh ia ka phom pynrung kyrteng bad ka ophis jong u SDO Civil Sohra hynrei la ong ba kim shym la ioh ban rung ha ka electoral roll.
Ka election commission ka tip ba ia ki shnong kiba don ha khappud bad ka Bangladesh la ithuh da ka sorkar bad ka jingia jingiarap jong ka sorkar ia kine ki shong ba shong kitei ki jaid bynriew ka long na ka por sha ka por, da kaba shna ia ki surok, ai khaw rashon, ka light bad wat ka Hospital na ka bynta katei ka thain.(SP News)
