Shillong, Risaw 22: Ki nongialam ka seng JSU Khliehriat circle ki lah kynduh ia i Bah Paul Lyngdoh ryngkat ka jingdonlang u MLA ka thaiñ u wei na u myntri ka jylla u bah Kyrmen Shylla.
Ka seng ki lah iakynduh iaki ha sngi ba u leit plie iaka jingkieng iaid kjat ha ka shnong Sahksaw bad na liang ka seng ki lah ai da ka dorkhas sha u myntri u Bah Paul Lyngdoh bad ka seng ka lah ai jingmut sha ka sorkar ban ai bhah bad bynta lang iaka East Jaintia ban ioh shna iaka ing sah bad sumar.
Ia ki ba kyrnì droks namar ka Distrik East Jaintia kadei kawei na ki jaka ba kham kynrei kiba dih droks bad kadei ruh ka jingrung jingmih u droks shapoh ka jylla bad ka seng ka lah pynsngew ba ka East Jaintia ka dei hok ban ioh iakane ka shlem jingsumar ia kiba kyrñi droks khamtam iaki khun samla ka thaiñ ba kin lait na une u jingdih pynbuaid u ba ialam bakla ha ka jingim jong ki.
Na liang u myntri ka jylla uba dei iaka tnat Social Welfare u lah shim khia ia kane ka jingai jingmut ka seng bad u lah bthah iaki bor peit bor khmih ban wad jaka kaba biang paka ban ioh buh kum kane ka shlem hapoh ka thaiñ.
