Shillong, Jylliew 20: Na ka liang jong ka Seng HYC ka pynpaw ia ka jingpynrem kaba jur ha kaba iadei bad ki briew kiba kren ia ki kyntien tohmet bad khamtam ia ki ktien khlem akor pyrshah iano iano la ka long ia ki briew shimet ne ki Nongmihkhmat Paidbah lane ia ki ophisar Sorkar lyngba ki Social Media.
Ka HYC ka pynrem jur ruh ia ka jingkren tohmet bad khlem akor da uwei u briew ha kine ki sngi lyngba ki Social media pyrshah ia I Deputy Commissioner jong ka East Khasi Hills District halor ka hukum ka jong I na ka bynta ban ai tika Covid-19.
Kane ka jingkren ka long pyrshah ia ka longbriew manbriew bad ka long rynieng khamtam ia ine I ophisar kynthei briew bad ia kaba na ka liang ka Seng ngi pynrem jur.
Kumta na ka liang ka Seng ngi kyntu ia baroh ki paradoh parasnam bad ki paidbah hi jong ka Jylla baroh ba ngin ia long adkar ha ka ktien ka thylliej lyngba ki jingkren ki jong ngi ha ki Social media ha kaba iadei bad kano kano ka mat.
Hooid ngim len ba kum ki Nongshong Shnong ha ka Ri Synshar paidbah ngi don ka hok ban pynpaw ia ka jingbymhun ka jong ngi halor kano kano ka mat ne ka polisi jong ka Sorkar ne ka jingpynbna jong ki ophisar ka Sorkar ne ki kam jong ki Nongmihkhmat paidbah.
Hynrei ym don hok pat ban kren tohmet ne pyndonkam ia ki kyntien khlem akor iano iano ruh khamtam eh kum ka Jaidbynriew tipbriew tipblei kam iahap ia ngi ba ngin pynmih ki kyntien ba ktah ia ka long rynieng jong ki Longkmie ki kynthei khynnah bad ia ka long rynieng jongno jongno ruh tang namar ba ngim iahap ia kaei kaba ki leh ne kren, ong u bah Roy Kupar Synrem general secretary ka HYC.
