New Delhi, K. Lyngkot 17: Ha ka por kaba kyrpang ha ka histori jong ka ri, u Myntri Rangbah duh, u Narendra Modi u la plie ia ka prokram ai dawai ha kylleng ka ri, kane kalong ka prokram ai dawai kaba heh tam ha pyrthei haduh mynta.
Ka jingpynlong ia ka jingai dawai COVID-19 ha ka sngi kaba nyngkong ha kylleng ka ri ka la long kaba iaid beit iaid ryntih. La pynlong baroh 3,352 tylli ki jingai dawai ha kaba 1,91,181 ngut ki briew ki la ioh dawai katkum ki jingioh jingtip haduh kane ka por. La don ka jingai dawai ia 3,429 ngut ki briew ha ki jaka jong ki kynhun iada ri. Palat 16,755 ngut ki briew ki la iadon bynta ha ka jingpynkhreh bad ka jingai dawai ha baroh kine ki jaka.
Ym shym la don kano kano ka jingpoi hospital ki briew kiba la ioh dawai haduh mynta.La pynpoi ar jait ki dawai COVID-19 ban ai ia ki briew mynta ka sngi.
La pynpoi ia u dawai Covishield (ba la shna da ka Serum Institute of India Ltd) sha baroh ki Jylla/UT. La pynpoi ia u dawai Covaxin (ba la shna da ka Bharat Biotech International Ltd) sha 12 tylli ki jylla.
La pynbiang lut ia ki jingdonkam ha baroh ki jaka ai dawai COVID-19 ha kylleng ka ri.La lah ba pynbeit ia ki jingeh barit baria kum ka jingslem ban kyntiew jingtip ia ka thup kyrteng ki nongioh dawai ha ki katto katne ki jaka ai dawai.
