Shillong, Naiwieng 28: Ka jingdawa ban plié ia ki hat ha khappud bad ka Bangladesh ka dei ka jingdawa kaba la slem bha bad kaei kaba u nongai ktien jong ki khleih nongsynshar ka dei kaba u la pynkynmaw ia ka sorkar na ka por sha ka por.
Ha ka jingiakynduh bad u myntri rangbah ka jylla u Dr Mukul Sangma na ka liang jong u Bah John F Kharshiing u la ong ba ka sorkar jylla ka dei ban ia kren bad ka sorkar pdeng ba kan ia kren ia kane ka kam bad ka sorkar Bangladesh ban plié ia ki 38 tylli ki iew khappud kiba la khang ha dien ka jingioh lait luid jong ka Ri India.
La ong ba ki paidbah Khasi bad Garo kiba im ha khappud bad ka Bangladesh kaba don haduh 443 KM ha baroh shilynter jong ka jylla la khang ia ka jingiakhaii pateng bad kim lah shuh ban leit sha ki iew kihat kiba don sha Bangladesh.
Kumba ka long mynta ki thain khappud ki dang sah dien palat ha kaba ki dang don kambun ki kam pynroi ha kiba bun ki liang lada lah ban plié biang ia kine ki iew ki hat kan long ka jingiarap ia ki paidbah jong ka thain kiba im ha khappud bad ka Bangladesh.(SP News)
