Shillong, Jylliew 28: U bah Himalaya M Shangpliang MLA jong ka Mawsynram u la ong ba ka jingdawa ia ka Mawsynram Civil Sub Division kala long 20 snem mynshuwa naduh ki snem 1993 bad ia ki jingthoh la dep ban ai na ka por sha ka por sha ka sorkar bad mynta ruh ki dang iai budien ia kane ka jingdawa.
Haba kren sha ki lad pathai khubor ha dien ka jingiakynduh jong ka Mawsynram Civil Sub Division Demand Committee (MCSDDC) la ong ba ki seng bapher bapher kila dep ban ai ia ki dorkhas sha ka sorkar na ka por sha ka por ban dawa ba dei ban pynioh ia ka Mawsynram Civil Sub Division, hynrei na kid aw kiba ym lah ban sngewthuh kane ka jingdawa kam shym la urlong.
Mynta ki paidbah jong ka thain Mawsynram da kawei ka jingmut kila shim ba dei ban dawa biang na ka sorkar ba dei ban ai ia ka Mawsynram Civil Sub Division namar kane ka jaka ka long kaba la sah dien sha ba palat ban ia nujor bad kiwei ki jaka wat la ia ka Mawsynram Block la plie naduh u snem 1963 ha ka por ba dang hap hapoh ka jylla Assam.
Na ka liang jong kane ka kynhun kan sa leit ban ai biang ia ka dorkhas sha u myntri rangbah ka jylla u Conrad K Sangma ban pynkynmaw ia ka jingdawa Civil Sub Division ki paidbah kiba hap hapoh jong ka Mawsynram Block. Ha kane ka jingialang bun na ki dkhot jong ka Committee kila ia poi lang ban ia mir jingmut kumno ban pyntyllun ia kane ka kam sha khmat.
Haba jubab ia ka jingkylli ba u bah PN Syiem MDC jong ka Mawsynram u la kynthoh ba kane ka jingdawa ka long kumba thied TV, na ka liang jong u Bah Himalaya, u la ong ba ka jingkular ba nyngeh eh jong u Bah PN Syiem ha ka por elekshon ka long ba lada jop yn wanrah ia ka Civil Sub Division hynrei ha ki 10 snem jong ka jinglong MLA ka jong u u khlem khot ia kane ka jingialang halor kane ka jingdawa Civil Sub Division.
