Shillong, Jymmang 06: Ka Hynniewtrep Youth Council (HYC) seng kmie mynta ka sngi ka 6 tarik u Jymmang 2024 ka la leit ban dawa na u chief Officer jong ka Shillong Municipal Board ban weng noh ia katei ka jaka bretniut ka ba don ha Motphran.
Katkum ka dorkhas ba ki la leit ban aiti da ka seng ha ka ba la soi da u bah Francis G Mawlong u ba dei u Vice President ka HYC CEC ha ka ba la wan ban synrang da u president ka seng u bah Roykupar Synrem bad kiwei kiwei pat ki dkhot.
Ha kane ka dorkhas la pynpaw ba katei ka jaka lum ia ki niut ka la wan rah ia ka jingsma ia ki paidbah nongleit nongwan bad ka la kylla long ruh kum ka ktem ia ki nongkhaii Drug.
Ha kane ka dorkhas la pyntup ruh ba na ka liang ka seng ka la lap da la ki jong ki khmat ia ka jingdon ki nong dih Drug ha kane ka jaka wat ha ka por mynsngi mynshai ruh.
Ha ba ioh ban ia kren bad ki nongthoh khubor na ka liang u President ka seng u Bah Roykupar Synrem u la ong ba ha ka 2 tarik u bnai Jymmang 2024 ki la ioh ban leit ban jurip ia kane ka jaka bret niut ka ba don ha Motphran ha ka ba ki dkhot jong ka HYC ki la lap ia ki briew ki ba pyndon kam ia kane ka jaka kum ka jaka rieh thngen jong ki ha ka ban ioh ban pyndonkam ha ka ban dih bad khaii ia u drug bad ban leh ruh ia kiwei kiwei pat ki kam sniew ha kane ka jaka.
U bah synrem u la ongruh ba kine ki nongdih drug ki ba pyndon kam ia kane ka jaka bret niut kum ka ktem jong ki ha ka ba ki nong leit nongwan bad kham tam eh ki khynnah skul ki ioh I pynlei pynlei ia ka jingiadung thyrnia inject jong kine ki briew.
U bah Synrem u la ong ruh ba hadien ba na ka liang ka seng ka la ioh ia ka jingujor na ka liang ki paidbah ki ba iaid ba ieng na kane ka jaka ha lor ka jingsma ha ka ba kim lah ban shah shuh ha ka ba ia kine ki niut la shu ieh baroh shisngi ia ki niut.
Kumta na ka liang ka HYC ka la wan ban ai da ka dorkhas sha u nongpyniaid jong ka Shillong Municipal Board ha ka ba ki la daw ba kidei ban weng noh ia kane ka jaka bret niut ka ba don ha Motphran ha ka ba kane ka jaka bretniut ka la kylla long kum ka matren ka ba don ha pdeng jong ka sor.
U bah Synrem u la ongruh ba lada ka Shillong Municipal Board kam lah ban weng ia kane ka jaka bretniut ka ba don ha Motphran na ka liang ka seng kam banse dalade ka ban leit ban weng ia kane ka jaka bret niut.
U la ong ruh ba ka seng kam lah ban shah ha ba ka ioh I ia kum kine ki jingia dih drug bad kumjuh ruh ia ka jingsma jong kane ka jaka ka ba don ha pdeng ka sor.
