Shillong, Nailar 29: U Symbut myntri rangbah ka jylla u bah Prestone Tynsong ba dei peit ia ka tnad shna surok, haba jubab ia ka jingkylli jong u bah Mathew B Kurbah la ong ba ki dons aw tylli ki surok ki ban sa shna ha Mawphlang Konstitwensi, na ka PMGSY-III ar tylli na ka state skhim 2 tylli.
Ka sorkar ka dang ap ia ka jingmang pisa na ka sorka pdeng bad na ka sorkar jylla ban ioh ha kane ka snem mang pisa kaba mynta 2024-2025, haba ia dei bad ka surok na Mawphlang sha Weiloi, la ong ba ka bynta kaba nyngkong la dep bad kaba sah na wah Umpamthiah sha Weiloi ki don kiwei pat ki jingtrei.
Haba jubab ia ki jingkylli bynrap u bah Prestone u la ong ba ka sorkar lyngba ka state skhim lada ka ioh ia ka jaka ka long ban pynheh ia ki surok, la ong ba ka jingeh ka long ba ym ioh jaka namar bun kim treh ban ai jaka kane ka jingeh kaba ka sorkar ka ia kynduh.
Haba juba ia kawei pat ka jingkylli bynrap jong u MLA ka Nongthymmai haba ia ei bad ki surok hapoh konstitwensi, u bah Prestone la ong ba u la bthah ia engineer jong ka PWD ba dei ha kane ka nongbah Shillong ban kin pynkhreh ia ki skhim ban siang rong ia ki surok ha kane ka nongbah Shillong.
Ka sorkar kwah ban pynbha ia baroh ki surok ha kane ka nongbah Shillong, la ong na ynda la ioh ia ka jingkhien jingdiah na ki engineer ia ka jinglut ban siang rong ia ki surok, yn sa rah sha ka sorkar ban ioh pisa ban pyntrei bad ban maramot ia ki surok ha kane ka nongbah Shillong.
Haba jubab ia jingkylli jong u bah Ronnie V Lyngdoh halor ka jingshna ia ka surok na Lawsohtun sha sha Upper Shillong ban iasoh bad ka NH-40, u bah Prestone la ong ba ka sorkar kala pynkhreh ia ka DPR bad mynta dang ap ia ka jingbit ban ioh na ka tnad khlaw.
