Shillong, Risaw 09: Ka jingia khun semifinal jong ka Meghalaya Youth League 2024 ia ka ba la pynlong mynta ka sngi ka 9 tarik u Risaw 2024 ha MFA ground Polo bad ha poh ka madan jong ka SAI NEHU Shillong na ka bynta ki under- 14 bad under – 17.
Ha ba phai sha ka jingialehkai ia ka under -14 ba la pynlong ha madan MFA Ground ha Polo ka jingiakhun ha pdeng ka West Jaintia DSA pyrshah ia ka Shillong Sports Association kala long ka ba I tynnad bha ha kaba haduh ban da kut ka kyllamit kine baroh artylli kim shym la lah ban thep ia ka kol ha ka ba ka la pynlong ia ki bor pyniaid ban kin pynlong da ka jingshut penalty ha kaba ka West Jaintia DSA ka la pynliem noh ia ka Shillong SA da 4-3 kol.
Hadien kata, ka Nongstoin DSA ka la lah ban pynliem noh ïa ka Ri-Bhoi DSA da 1-0 kol, ha kaba ka bol kaba la shut da u Refel Markwius Wanniang ha ka minute ba 45 ka la ïaid lait ïa ki gloves jong u nongap kol.
Ha ka U-16 kaba la ioh ban pynlong ha Sports Authority of India centre ha NEHU. Ka Shillong SA ka la lah ban jop da 4-1 kol pyrshah ia ka West Jaintia DSA. Ia ki kol na ka bynta ka Shillong Sa la thep da u Iminstar Mawlong ha ka minute ba 46, u Menangpyndap Khongjee ha ka minute ba 51 bad u Wanpyndap Kharkongor ha ka minute ba 77. Kat ba ia ka 1 kol na ka bynta ka West Jaintia DSA la ioh ban thep da u Serene Dkhar ha ka minute ba 90’+1 lyngba ka penalty.
Ka Ri Bhoi District Sports Association ka la lah ban pynliem noh ia ka Nongstoin da 3-2 kol. Ka Ri Bhoi DSA ka la lamkhmat ia ka jingthep kol lyngba u Me-u-ba-ai Sumer ha ka minute ka ba 9,hynrei u Mickystar Diengdoh ha ka minute ba 23’ u la lah ban pynïakhaid na ka bynta ka Nongstoin.
Wat la katta ruh ka Ribhoi kam shym la duh jingkyrmen hynrei ha ka minute ba 27 ka la ioh ban pyn khih jar lyngba u Prosperwell Ryntong bad Me-u-ba-ai Sumer u la ioh ban thep pat ia ka kol ha ka minute ka ba 58. Ka Nongstoin ruh khlem da duh jingkyrmen ka la ioh ban thep ia ka kol lyngba u Shemborlang Snaitang ha ka minute ba 85, hynrei ka RBDSA ka la lah ban bat ïa ka jingjop.
Ki kynhun ki ban ioh ia khun ha ka final jong ka U-14 kan long hapdeng ka West Jaiñtia District Sports Association pyrshah ia ka Nongstoin District Sports Association, katba ka U-16 kan ïakhun pyrshah ïa ka Shillong Sports Association pyrshah ia ka Ri-Bhoi District Sports Association.
Ha kane ka jingialehkai ha kaba baroh saw tylli ki kynhun ki angnud ban ïoh rah ha kti ïa ki khusnam jong kane ka lympung ba nyngkong eh, kaba la pynlong da ka Meghalaya Football Association ryngkat ka jingkyrshan jong ka sorkar Meghalaya. Ka jingialehkai yn pynlong ha madan ïalehkai SSA First Ground ha Polo. Ka U-14 Final kan sdang ha ka por 12:30pm, bud sa ka U-16 Final ha ka por 2:45pm.
