Shillong, Nailur 23: Ka kmie jong ka Syiem jong ka Ri Bhutan ka Majesty Gyalyum Dorji Wangmo Wangchuck kala ia kynduh ia u president jong ka Ri India u Ram Nath Kovind, ha Rashtrapati Bhavan ha ka Sngi Saitjain.
Haba pdiang burom ia ka kmie jong ka Syiem ka Ri Bhutan, na ka liang jong u president jong ka Ri India u la ai ka jingiaroh ia ka Ri Bhutan kaba la lah ban pynlong ia ka tamasa lehkmen kaba shitaiew lynter ban pyni ia ki riti dustur jong ka Ri Bhutan.
Kane ka tamasa ka long ban rakhe ia ka jingdap 50 snem jong ka jingiadei ha pdeng kine ki ar tylli ki rib a marjan ka Ri India bad ka Ri Bhutan. Ha kane ka jingleh kmen kaba shitaiew lynter yn pyni ia ki riti dustur jong kane ka ri bad kane kan dang wanrah ia ka jingiajan ha pdeng ki paidbah nongshong shnong ha kine ki ar tylli ki Ri.
U President jong ka Ri India u la ong ba ka India bad ka Bhutan ka don kata ka jingiajan bad kane ka jingiajan ka kham long kyrpang ban na kiwei pat, na ka liang jong ka Ri India ka da kut jingmut ban dang kham pyniajan shuh shuh ia kane ka jingiadei bad ka Ri Bhutan ha baroh ki liang.
