Shillong, Risaw 30: Ka Indigenous Partnership for Agrobiodiversity and Food Sovereignty (TIP) lyngba ka jingkyrshan lang jong ka Pgakenyaw Association for Sustainable Development (PASD) bad ka Stockholm Environment Institute (SEI), Asia Office ka lah pynlong iaka jingialang iamir jingmut haka 28th tarik u Risaw 2024 ha ka office treikam jong ka SEI , Asia ha Bangkok.
I Bah Phrang Roy, Coordinator TIP, haka kyntien lamphrang i lah pynkynmaw ia ki jingthmu jong ka UN food system summit 2021 ka ba banjur ia ka jingdonkam ba ngi donkam ban peit ia ka rukum pynmih bam ka ba skhem kaba ka nongrim jong ka kadei haka mariang bad ka bynta ka ba kongsan jong ki riewlum ba ki dei ba leh, khnang ba ngi lah ban jop ia kane ka jingthmu.
“Ha ka jingia phylliew jingmut ha ka jingialang, kum ki riew lum, ngi la ai jingmut sha ka UN, ba lada ka UN ka kwah ban phai khmat sha ka bam kaba bha bad ba skhem, kan ym lah ban iaid lait ne ban jngai na ki riewlum namar ka bam ba ki pynmih ki long kiba la pynshong nongrim ha ka mariang” I la pynpaw shuh shuh ia ka jingsngew sarong ba kumno ki riewlum ki wan sha khmat ban pynneh ia ka spah mariang”
U Dr. Prasert Trakansuphakon, jong ka seng PASD, Thailand, u lah iaroh iaka jingtrei jong ki riew kynthei kiba la ialam ia ka jingthmu ban iada ia ki rukom bam tynrai. U la kyntu jur ruh ia ka jingdonkam jong ki jaidbynriew trai ri ha kaba iadei bad ban pyneh pynsah ia ka mariang bad ban wanrah ruh ia ki buit thymmai jong ka rukom rep tynrai kiba lah ban iakhun pyrshah ïa ka jinglong ka suiñbneng.
U Niall O’Conner na ka Stockholm Environment Institute (SEI) jong ka dewbah Asia u lah pynpaw ka jingiaroh ia ka jingstad bad jinglong kyrpang ki riewlum. U pynpaw ruh ba u don jingkyrmen ba kane ka jingshemphang jong ki ka lah ban saphriang kylleng ka pyrthei khlem ka jingshah shim kabu ha kiwei.
Hadien ki kyntien lamphang la bud sa ka jing batai jong I Kong Gratia E. Dkhar, naka seng NESFAS I ba dei I nong khmih bad peit kumno ban pyntyllun iaka jingwad jingtip jong ka TAPE Study haki saw tylli ki ri kum ha Mexico, Kenya, Northern Thailand, and Northeast India.
I Kong Gratia Dkhar, International TAPE Coordinator na NESFAS ila batai bniah bha ba kumno ka rep tynrai ka don ia ka bor kaba khlain ban ai ka jing shakri kaba iaineh. Ila ban jur ruh ba ngi donkam ban pynphriang ia kane ka khubor sha ki nongshna ain ba ki dei ban ai ka jingkyrshan ban pynkhlain ia ka rep ka riang tynrai khlem da don kano kano ka jingniewbein ia ka hok tynrai ia ki jaka puta.
Haba peit bniah bha ruh, ngi lap bad shem ba ki jingwadbniah haba iadei bad ka rep tynrai ki dang duna bha. “Namar kata ka daw, ka don ka jingdonkam kyrkieh ban kyntiew ïa ka jingïadei hapdeng ka jingtip tynrai bad ka jingtip saian, bad ngi kyrmen bad khmih lynti ban tei ïa ki jingïatreilang ban buh ïa kine ha ki kam.” i lah kyrpad ia ki nong iashim bynta ha ka jingpynkut jong i.”
U Dr. Dhrupad Choudhury, Ecologist, Indigenous Food Systems Expert bad TIP Advisor u lah batai bniah bha ia ki sien jam ba kum ki riewlum ngi dei ban shim haba iadei ban pynkhlain ia ka rep ka riang tynrai. Hakane ka jingialang ruh lah pynsngew iaka jingmih na ka rynsan jingialang kaba dang shu dep long shen ha UN-IFAD Rome ha u Bnai Risaw 11,2024.
Ka Nofri Yani, kaba wan na Indonesia bad U Daniel Hayward, FAO kilah ia sam jingmut lyngba ka jingshemphang jong ki halor ka jingkongsan jongka Immersive Retreat (Ka jingleit jngoh sha ki shnong ki thaw) bad kumno ka ba leit jngoh hi sha ki shnong ka pynsngewthuh shuh shuh ia ka jingim bad jingtrei jingktah jong ki riewlum.
I Bah Richard Ranee, iwei naki nongrep naka shnong Nongtraw, East Khasi Hills, Meghalaya, India ha kaba i lah pashat jingmut halor ka jingim jong ki nongshong shnong bad ka rukom rep rukom riang haka shnong ka ba i wan kaba hap ban hiar kumba 4000 ki mawlynti ban poi sha shnong.
Shuh shuh I Bah Richard ila kren shaphang ka jingkongsan jong ka rep shyrtie ha ka shnong jong I bad iathuh ruh shaphang ka jingriewspah jong ka thung ka tep bad ka bam ka dih ka ba bsa bad ka ba ai ia ka jingkoit jingkhiah ia ki na ki jhurkhlaw bad ki kynbat dawai. Bad i ong ruh ba ka shnong ka iatreilang bad ki longkmie ban wanrah ia ka jingshong shngain ha ka rep ka riang tynrai.
Shuh shuh ki don ar ngut ki riew shemphang jong ka jaitbynriew Karen kita kidei u Father Luang Chaiprasit Poka uba naka shnong Hin Lad Nai bad u Siwakorn Odochow na ka shnong Nong Tao kaba don ha ri Thailand ha ka jingkren jong ki, ki ong ba kat kum ka jinglong jingim jong ki ka don ka jingiadei ba ia jan bha hapdeng ki briew bad ka mariang.
Ki kdew ba kane ka jingiadei ba jan ka lah pynlong ia ki ba kin iakhun pyrshah ia ka khlam Covid-19 khlem kano kano ka jinduna bam. Ki pynpaw ruh ia ka jingsngewkmen ba kum ki longkmie ki don ruh ia ka iktiar ban leh khambha shuh shuh ban kyntiew ia kane ka kam.
Ka don ruh ka jingiakren halor ka jingkongsan jong ki bynta bapher bapher kiba iarap ban pynphriang ia ki symbai kiba dei ki thymmei ban pynriewspah ia ka mei mariang khamtam kum ki ngap kiba ngi ju iohi bha ha ki shnong ka thaw.
I jingkren lyngkot naka U Boonsong Thansrithong, ECHO Asia u lah ai jingmut ia ka rukom pynlang symbai jong ki nongrep na ka ri Asia baroh kawei bad ki symbai kiba biang tam kilah ruh ban iasam bad ki para riewlum. Katba u Aditya Gangadaran jong ka The Nature Conservancy u lah ai jingmut ban kyrshan ba dei ban pynkhlain ia ka ioh ka kot kaba ban wan naka spah mariang.
Ka Tara Shyam, Director REGEN10 kala ban ha ka jingkren jong ka ba ki rukom pynmih bam ba ai jingim ki dei ban wanrah ia ka jingbha ia ka mei mariang, ka ioh ka kot kaba neh bad khamtam kiba iadei dur bad ka kolshor bad riti dustur. Ka pynpaw ruh ia ka jingkloi ban ia treilang bad ka TIP ban ioh ia kane ka thong.
Khatduh la pynbud daki jingai jingmut na ki ki riewlum kiba ia don ryngkat haka jingialang hakaba kilah ia mynjur lang ban pynkhlain shuh shuh bad bat skhem iaki jaka ki pud ki sam da ki jaitbynriew riewlum na ka bynta ban iada ia ki spah mariang. Kala mih ruh ka sur ba ngi donkam ban pynkhlain ia ka jingiadei bad ki khun samla ba kin ieid bad burom ia ka rep tynrai. Kaba sngewtynnat shuh shuh ka long ba U Niall O Conner, Director SEI Asia, u la iawer ban ia treilang nangne sha khmat ban jop ia kane ka thong.
