Shillong, Jylliew 28: La pynlong ia ka jingialang Commissioner level India-Bangladesh Joint Group of Customs kaba 7 ha Shillong ha ka 27 bad 28 tarik u Jylliew, 2024.
Ka kynhun ki saw ngut ki dkhot na Bangladesh ka dei kaba la khlieh da u Md. Kamruzzaman, Commissioner, Customs, Excise bad VAT Commissionerate, Jashore, katba ka kynhun jong ka India kabadon 10 ngut ki dkhot kadei kaba la khlieh da u M. Rahman, Commissioner of Customs Preventive Commissionerate, NER, Shillong.
La pynlong ia kane ka jingialang ban plié lad ia ki jingiatreilang, kyntiew ia ka jingseisoh ki kam bad ruh ban rah shakhmat ia ki thong kiba baroh artylli ki ri ki don ha ki kam pyniaid customs bad ruh ban pynkhlain shuh shuh ia ki jingiatreilang ha ka jingpyntreikam ia ki kam customs, ka jingplie lad ia ki kam khaii pateng bad ka jingshngain ha ki jaka khappud.
Hadien ka jingialang, la pynbeit ia ki kam ki jam ba dang sah bad la iakren ruh shaphang ki kam kiba bun ban rah shakhmat sha ki kyrdan bad ki rynsan kiba dei peit ia kine ki kam ha kaba yn pynbeit ia kine ki kam kiba iadei bad ka customs bad ruh ki kam kiba iadei bad ka khaii pateng.
U khlieh duh jong ka kynhun na Bangladesh u la ai jingsngewnguh ia ka Indian Customs kaba la pynlong ia kane ka jingialang bad kaba la pynthikna ba ki jingiakren ki wanrah ia ki jingseisoh.
Ia ki minute jong kane ka jingialang la iasoi da baroh arliang hadien ba la poi sha ka jingiasngewthuh jingmut shaphang katto katne ki kam kiba iadei bad ki kam khaii bad ki rukom treikam customs hapdeng ki artylli ki ri.
Kane ka jingialang ka long kum u mawmer ha ki jingiadei hapdeng ka India bad Bangladesh ha kaba la paw shai ka jingiatreilang ban kyntiew ia ka jingplie lad ia ki kam khaii pateng bad ki jingiatreilang hapdeng kine artylli ki ri.
Kine ki jait jingiakren kiba seisoh ki long kiba kongsan bha na ka bynta ka jingpynkhlain bad ka jingpynseisoh ia ki kam khaii pateng, ka jingkyntiew ia ka ioh ka kot bad ka jingriewspah.
La rai ban pynlong man ka por ia kine ki jingialang Commissioner level hapdeng ka India bad Bangladesh ha ka jingialang Joint Group of Customs kaba 5 kaba la long ha Dhaka, Bangladesh ha ka 23 tarik u Rymphang, 2009.
