Shillong, Iaiong 12: Ka jingthep vote ban jied ia ki 29 ngut ki MDC sha ka iing dorbar jong ka GHADC kala long mynta ka sngi, ha kaba ka ilekshon kala iaid beit iaid ryntih khlem da don kano kano ka jingia klumar ha baroh ki jaka thep vote.
Ka jingpoi jong ki nongthep vote baroh ki long 60 %. Ka jingiathep vote kala sdang ha ka por 7.00 baje mynstep haduh ka por 4.00 baje jan miet. Baroh ki kyrtong kiba la ia khun ha kane ka ilekshon ki long 182 ngut, bad na kine 75 ngut ki kyrtong shimet.
Ki party kiba la pynieng kyrtong ki long ka Congress, BJP, NPP, UDP, NCP, katba kiwei pat ki dei ki kyrtong shimet. Ka jingniew vote na ka bynta kane ka ilekshon MDC sha ka iing dorbar jong ka GHADC kan long ha ka 15 tarik mynta u bnai.
U Myntri Rangbah ka jylla u Cornad K Sangma ruh u la leit ban thep ia ka vote jong u ban jied ia u MDC sha ka iing dorbar thawain jong ka GHADC, ka jingiathep vote kala iaid beit iaid ryntih mynta ka sngi.
U Commissioner secretary u bah Aldus Mawlong haba kren ha u SP News Agency u la iathuh ba haduh mynta por 5.30 Pm la ioh jingkhein ba ki nongthep vote kila kot sha ka 60%, na ka liang jong u Commissioner secretary u ong ba ka lah ban poi sha ka 65% namar ba dang bun ki jaka ba pat ioh jingkhein namar ba kam biang ka network.
