Shillong, Jylliew 18: U Myntri ka tnad ka koit ka khiah ka jylla u bah AL Hek mynta ka sngi u la iathuh ba ha ka jingialang ka sorkar kala shim ia ka rai ban nym don shuh ka jingkhangdam, hynrei la aiti sha ki Deputy Commissioner jong ki District ba kin peit katkum ka jingdon kam.
Halor ka jingkynnoh jong u nongialam jong ka liang pyrshah ba ki Ventilators kiba la ai lyngba ka PM Cares kim trei kam, u myntri ka tnad ka koit ka khiah u la ong ba halor kane ka sorkar kan sa peit ia kane ka jingkynnoh.
Haba ia dei bad ka jingphah test ia ki briew kiba khlad ha ki iing, u myntri ka tnad ka koit ka khiah u la ong ba kane kan shong ha ki trai iing la kin phah ne em ban test, wat la ka sorkar kala pynmih ia jingpynbna.
Haba la kylli ia ka jingpynpaw pyrshah jong ki katto katne ia ka jingbthah ka DC ka East Khasi Hills u myntri u la ong ba kiba pyrshah ki don tang katto katne ngut , hynrei kiba bun ki kyrshan khamtam kito ki COVID-19 Management Committee ha ki shnong ki thaw.
