Shillong, Naiwieng 14: Ka Myntri Khynnah ka tnat Tribal Affairs, ka Renuka Singh ka la pyniaid ia ka jingialang ban peit sani ia ki skhim ka Sorkar Pdeng lyngba ka tnat Tribal Affairs ha kaba la iadon lang u Myntri ka tnat kam poh iing, ka bam, ka Civil Supplies & Consumer Affairs, ka ain bad ka bor ding ha Meghalaya, u James PK Sangma. Kane ka jingialang ka la long ha ka Secretariat, Shillong.
Ha kaba iakren bad ki ophisar ka sorkar Meghalaya kiba dei na ki tnat bapher bapher kum ka Planning, Education, Health & Family Welfare, Agriculture, Forests, Tourism bad kiwei kiwei pat, ka Singh ka la ong, “Ka Sorkar Pdeng hapoh ka jingialam u Myntri Rangbah ka Ri u Narendra Modi ka la pynlong kongsan duh ia ka jingkiew bad ka jingkyntiew ka rukom im ki riewlum ha ka ri India.
La sdang ia katto katne ki skhim ha kane ka ri kiba don ka thong ban wanrah ia ka jingbha jong ki riewlum.” Ka Myntri ka la ban jur ba ka Sorkar Pdeng ka peit bniah ia ki kam ba iadei bad ka roi ka par ha ka thain shatei lam mihngi.
Ka Myntri ka la iathuh ba ka Tnat Tribal Affairs kan sa seng 50,000 tylli ki ‘Van Dhan Vikas Kendra’ ha ki jaka rilum jong ka ri khnang ban kiew ka ioh ka kot jong ki briew. Ka la kyntu ruh ia ka sorkar jylla ba kan seng ia kine ki ‘Van Dhan Vikas Kendras’ ha Meghalaya da kaba iatrei lang bad ki Self Help Group.
Ka Myntri ka la kren ruh halor ka jing pynlong ia ki ‘Adi Mahotsav’ ha ki jaka bapher bapher ka ri lyngba ka Tribal Co-operative Marketing Development Federation of India Limited (TRIFED). Ka Myntri ka la ban jur ba ki riewlum kiba trei ia ki kam shna tiar, thain jain bad kiwei kiwei pat ki la lah ban die bun bha ia la ki mar hadien ba ki la iasoh bad ka TRIFED bad ki la iashim bynta ha kine ki ‘Adi Mahotsav’.
Ka Myntri ka la iaren ruh shaphang ka jingpynbiang ia ki lad ki lynti ban plie lad ia kine ki nongshna jingshna ba kin die ia la ki mar lyngba ka bor internet sha ki briew ha kylleng ka pyrthei. Ka Myntri ka la iathuh ba don 105 tylli ki jaka pyni tiar (showroom) jong ka TRIFED ha ka ri bad ba ka thong jong ka Sorkar ka long ban kyntiew ia kane haduh ban da don 200 tylli shuwa u snem 2022.
Ka Myntri ka la kyntu ia ka sorkar jylla ba kan ai jingmut bad ban pynkhreh ban pynlong ia ka ‘Adi Mahotsav’ ha Meghalaya ha u snem 2020 bad ban sdang ruh ia ka jaka pyni tiar lyngba ka TRIFED khnang ba ki nongshna tiar kiba tbit na kane ka jylla kin ioh jingmyntoi.
U Dr. Vijay Kumar D, Commissioner & Secretary, Planning Department jong ka Meghalaya u la batai bniah ia ka jingling jingman jong ki skhim ba la pyntreikam da ka sorkar jylla naduh u snem 2015-16. U Dr. Kumar u la kren kham bniah shaphang ka jingsdang ia ki Common Facility Centre, Knowledge and Cultural Centre, ki karma pule ha ki skul, ki Market Complex, ki Dairy bad ki Nursery, ki pung dohkha, ki Skill Development centre.
La ong ba buh ia ki hostel ia ki shynrang bad kynthei ha ki distrik bapher bapher ha Meghalaya katkum ki skhim ka tnat Tribal Affairs ha ki thup agriculture, rural development, education, tourism, culture bad kiwei kiwei. U Dr. Kumar u la ong ruh ba ka National Games 2020 yn pynlong ha Meghalaya bad namar kane, ka sorkar jylla ka la sdang ia ki projek ban kyntiew ia ki kam ba iadei bad ka jingialehkai.
Ka Myntri ka la peit ruh ia ka jingling jingman jong ki skhlorship na ka bynta ki khynnah pule bad halor kane, la iathuh ia ka ba la sam ia ka scholarship sha kumba 10,000 ngut ki khynnah pule ha kine ki ar snem. Ki ophisar ka sorkar jylla ki la pyntip ruh ba naduh kane ka snem, yn pyllait ia ki scholarship sha ki bank account jong ki khynnah pule.
Ka Myntri ka la pynkut ia ka jingkren jong ka ha ka jingialang da kaba kyntu ia ki ophisar ba kin pynsaphriang jingtip hapdeng ki riewlum shaphang ki skhim bad ba kin trei minot ban pyntreikam ia kine ki skhim.
U James P K Sangma u la pynkut da kaba kular ba ka sorkar jylla kan pyntreikam ia baroh ki skhim bad ban leh ia kaba donkam na ka bynta ka roi ka par jong ka jylla bad ka ri baroh kawei. U la ong ruh ba ka jylla ka kyrmen ban nang ioh jingkyrshan na ka Sorkar Pdeng.
