Shillong, Naiwieng 19: Kum shibynta ban shim ïa ka sienjam kaba kongsan ban pynthikna ïa ka jingbha jingmiat jong ki nongialam ka lawei, ka NESFAS ha ryngkat ka jingïatreilang bad ka DSEL, Meghalaya ka la pynlong ia ka School Meal Program ha ka 19 tarik u Naiwieng, 2024, ha Laitsohpliah Community Hall.
Kane ka jingïalang la sakhi ïa ka jing don lang jong ki nongïalam shnong, ki nonghikai, ki kmie ki kpa, bad ki riew shemphang ban ïakren bad iamir jamut halor kane ka phang.
Shwa ban sdang ka program, ki nongïashim bynta ki la leit jngoh ïa ki kper skul jong ka Laitsohpliah bad Subakalai, da kaba ki la ïoh ïa ka jingmut shaphang ka jingpyntreikam ïa ki kper skul.
Kine ki kper kim dei tang ki tyllong ba lah ban ioh iaki jhur ki ba khlem dawai nabynta ban pyndap ha ka ban sam ja sngi ia ki khynnah hynrei ka long ka ba kordor ka ba lah ban ai jinghikai ia u khynnah.
Ka jingialang la sdang da ka kyntien pdiang ba la ai da i Bah W Marwein, Rangbah shnong ka Laitsohpliah. u Bah Pius Ranee, Executive Director ka NESFAS, lah ai ia ka jingtip kyllum halor ka bam ka dih ka rep ka riang tynrai da ka ba ban jur halor ka roi ka par jong ka mynta khlem da pynthut noh iaka lawei da ka ba ong, “Ki khynnah ki don ka jingtip halor ka spah mariang lyngba ki nonghikai kum i Babu Nestar i ba don ka rukom ai jinghikai ka ba kyrpang da ka ba ialam iaki khynnah sha khlaw ban pynithuh iaka spah mariang bad ka sawdong sawkun ha ryngkat ki rangbah ki ba don ka jingstad tynrai .”
U lah bynrap ruh da ka ba i ong ba kane ka School Meal program ka long kaba kongsan namar ba ki shnong ki dei ki nong shim bynta ba ha khmat eh. Kylleng ka pyrthei ki don ruh iaka ka thong ba ha u snem 2030 baroh ki khynnah skul ki dei ban ioh iaka bam kaba tei met. Namar kata i lah kyntu jur ruh ba ngi dei ban ia shim bynta lang ban ioh ia katei ka thong haneng khamtam eh haka jylla Meghalaya.
Babu Nestar Kharmawphlang, Head Teacher jong ka Laitsohpliah school, i lah pynshai ba ka school meals ba lah sdang daka NESFAS ka dei ban ia leh pyrshah ia ka jingpangkhrew.
U la bynrap shuh shuh da ka ba ong kumne, “Ngi lah shna iaka rukom pyndonkam iaka spah mariang ka ba lah ban ai jingbam ka ba tei iaki khynnah skul, ki ba ha ka ba myn nyngkong kim shim la treh ban bam iaki jhurkhlaw hynrei hadien ka jingpyntrei kam kham bha lyngba ka rukom shet ban pynbang ki khynnah ki la sdang ban bang ban bam,”.
U lah ong ruh ba ki kper skul kim dei tang ba ka iarap nabynta ban pyn ioh iaka bam ja sngi ka ba bha hynrei ka ai ruh ka lad ba ki khynnah kin don ka jingiadei ba jan bad ka mariang.
Kong Barilin Swer i lah ai jingmut na ka liang ki kmie ki kpa bad ki nongrep, ula pynpaw ïa ka jingsngew kaba bha haka liang jong ka school meals program ba ka la ai ruh ïa ka koit ka khiah bad ka jingpule ia ki khun jong ki, bad ka jingdonkam jong ki thup jingbam ka ba la kynthup ha ka bam jong ki.
La ong ruh ba ki kmie ki kpa mynta ki pyrshang ban pynwandur ïa ki jingbam ha la ki jong ki jong ki ïing ki sem ruh kumjuh bad la pynshlur ïa kiwei pat ki kmie ki kpa ban ai sngewbha ïa ki jhur khnang ba ki khynnah baroh kin ïoh ban ïasam lang ha ki skul jong ki.
U Swapnil Tembe, Director jong ka DSEL, u la ai khublei ïa ka NESFAS bad ki nonghikai skul halor ka jingpyrshang ban kyntiew ïa ka jingbam ba tei ha ki skul, ha kajuh ka por u la ai ruh ka jingkular ba ka sorkar ka long kaba kloi ha ka ban ai ka jingkyrshan ïa kum kine ki jingthmu khamtam ia ki kper ha ki skul ka long ka ba kongsan tam ba baroh ki skul ki dei ban don.
U la ong, “Kane ka rukom iatreilang ka long kaba donkam bha na bynta ka jing jop ka ban iai bteng bad ba neh”. Nga ngeit ba da kaba pyniar ia kine ki jingthmu bad pynbha ia ki jingbam, ngi lah ban pynbha shuh shuh ia ka jingbam jong ki khynnah skul jong ngi bad ban ialeh pyrshah ia ki jingeh kiba kongsan ha ka iadei bad ka koit ka khiah kum ka jing pangkhrew ka met bad ka jingduna snam.
To ngin iai bteng ban shim khia da ka ba buh ia ki jhur ba ioh na shnong hakhmat eh bad ban pynkupbor ïa ka pateng ban wan ba kin long ki nongbam bad ki nong pynmih jingbam kiba don ka jingkitkhlieh.”
Ka jingthmu jong kine ki prokram ka long kum ka sienjam ba don jingkyrmen ban thaw ia ka lawei kaba phyrnai na ka bynta ki khynnah skul. Da kaba pynbiang ïa ki jingbam kiba tei met bad pynroi ïa ki rukom bam kiba lah ban neh, ka school meal program ka long ka sienjam kaba kongsan ha kaba pynkupbor ïa ki jingmut jingpyrkhat kiba dang samla bad ban tei ïa ki imlang sahlang kiba koit ba khiah.
Ia ka jingialang la pynkut da ka ba ia bam ja sngi lang ha skul da ka ba pyni ruh ia ki jingbam kiba tei iaka met bad ba la pynkhreh da kaba pyndonkam da ki jhur ba ioh na ki shnong.
