Shillong, Kyllalyngkot 14: U Shongknor ba rim jong ka iing dorbar thawain ka jylla u Martin M Danggo u la ong ba “ka jingmih khubor ban mih na ka NPP ka long ban pyniashrut ia nga bad u Myntri rangbah ka jylla, kum ba la paw ha ki lad pathai khubor bad kumjuh ha ki social media”.
Ha ka khubor kaba la phah mynta ka sngi u MLA barim jong ka Ranikor u la ong “Ngam don jingtip eiei ruh em ia kata kaba la mih ha ki lad pathai khubor ne ki social media, nga don sha shnong ha kine ki sngi bad kam shym la don kata ka jingiakren ruh ban mih naka party NPP”.
La ong shuh shuh ha ka kyrwoh kaba la phah mynta ka sngi sha ki lad pathai khubor u long ong baiang “Kumba la paw ha ki lad pathai khubor bad ki social media bala kynnoh ba u myntri rangbah ka jylla u Conrad K Sangma ba u leh bein ia nga, halor kane ka jingkynnoh na ka liang jong u mytnri rangbah ka jylla kam don eiei kum kata ka jingleh bein ia nga”.
U MLA barim ka Ranikor u la pynkynmaw ba “ha ka jingshisha nga sngewnguh ia u myntri rangbah ka Jylla iaka jingai ia ka Ranikor Civil Sub Division bad u la thung ia nga kum u Co-Chairman jong ka State Planning Board, ha ka kyrdan kabinet minister”.
U Martin M Danggo u la ong ba u shim ba kane ka dei tang ka buid jong no re jong no ban wanrah ia ka jingiapher jingmut ne ban wanrah ia ka jingsngewthuh bakla ha pdeng umyntri rangbah bad u, la ong ba haduh mynta kam don kano kano ka jingiapher jingmut hapdeng jong u bad u myntri rangbah bad kumjuh bad ka party NPP.
U la ong ba lada don kano kano ka jingkylla ha dien ha but ruh, un nymleh lyndet khlem da kren ia u National President jong ka party u ba dei u myntri rangbah ka jylla Meghalaya bad ia u State President bad ia ki nongialam ba ha khmat duh jong ka party bad lada u lehruh un resign shuwa na ka kam ba nga bat mynta kum u Co-Chairman State Planning Board bad naka party.
Halor ka jingpaw ha ki lad pathai khubor ba u kwah ialeh ia ka kam MDC kane ka long ka bym don nongrim haei haei ruh, haba ia dei bad ka MDC ilekshon u la ong ba un ai ka jingkyrshan ia uno uno u kyrtong ba ioh ia katiket jong ka party NPP.
Ka jingmih ha ki lad pathaikhubor ba un mih naka party NPP ka long ka bym shisha bad ka bym don nongrim haei haei ruh, u la ong “hooid naka liang jong ka seng Congress ki juhkhot biang ia nga hynrei ngamshym la pdiang ia ka jingturwa ia mynta”.
