Shillong, Nailar 29: U Bah Banshai Marbaniang, u samla treimon sngewbha napoh Mawsynram mynne ka sngi u la ioh ban iakynduh ia u R. K. Gupta, Deputy Commissioner jong ka Navodaya Vidyalaya Samiti, Regional Office jong ka Jylla Meghalaya na ka bynta ban ia kren sani halor ka jingpynslem na bynta ban tei ia la ka jong ka Iing Skul bad ki jaka sah ba junom bad ba biang jong ka JNV School hapoh ka Shnong Mawsynram.
Ha kaba sdang jong ka jingiakren la batai shai ha u Deputy Commissioner ba katei ka JNV School hapoh Mawsynram la shu pynlong skul tang ha ki Iing ba malu mala jong ka Block ophis hapoh Mawsynram bad nalor ba kadei ka Skul kaba la iaid mynta la kumba 9 snem pynban ki khynnah kiba pule ha katei ka skul ki dang long tang kum ki mraw kiba shu sah khlem da khein bad niewkor eiei na bynta jong ki bad kin hap ban mad ia ki jingeh kiba bun kiba ki iakynduh manla kapor.
Ha kane ka jingiakynduh na ka liang jong u Bah Banshai u la ioh ruh ban pynpaw ha u ba baroh ki khynnah kiba pule ha katei ka skul ki ju mad ia ki jingeh kiba bun khamtam ha ka por Slap nalor ba kadei ruh ka jaka kaba jur slap tam kumba la tip da ka pyrthei baroh kawei.
Katkum ka jingiakren halor katei ka bynta, la buh ha u ia ki jingkylli ba balei kan hap ban shimpor da ki bun bun snem ia ka tnad ban pynlong ia ka skul ha kitei ki jaka ba shu tap malu mala. Bad kaba ar nga la ong ruh ba balei kan hap ban shimpor haduh katne tylli ki snem ban shna bad wanrah ia la kajong ka Iing Skul kaba paka na bynta ki khynnah kiba pule ha katei ka jaka.
U R. K. Gupta u la jubab ba katkum ki mad treikam jong ka Sorkar na bynta ban pynkhreh ia ka jingmang tyngka la aiti hapoh ka Central Public Works Department (CPWD) na ka bynta ban pynbit pynbiang kumjuh ruh bad ban pyndep shi syndon ha ka ban shna ka Iing Skul, ki Hostel bad baroh ki jingdonkam katkum ba la mang nadong shadong.
U Deputy Commissioner u la jubab ruh ba na ka liang jongka tnad jong u ka la dep ban aiti shapoh ka tnad CPWD ban leh ia kaba donkam baroh bad haduh mynta um shym la ioh jingtip eiei shuh ba na kaei kadaw kaba la pynlong ban pynslem ia ka kam haduh kat mynta. U la kular ba un sa bud dien ia kane ka kam bad ruh ban iakren bad ka tnad CPWD ba balei khlem da lah ban sdang ia ka kam wat hadien ba la dep ban aiti ban pynkhreh nadong shadong.
Nakaliang u Principal u la jubab ba kadaw bah kaba la pynlong ban pynslem ia ka jingtei ia ka ing skul kadei halor ka jingpynkylla thymmai biang ia ka jingmang tyngka napoh ka CPWD. Dei halor kane ka bynta kaba la pynkylla long ban dang shimpor shuh shuh ban sdang tei ia ka ing skul jong ka JNV hapoh Mawsynram.
U R.K. Gupta hadien ba u la khot ia u Engineer jong ka ophis ban kylli bniah halor katei ka mat bad u Engineer u la jubab ba ka Estimate ba thymmai la dep pdiang bad ka shong sa tang hapoh ka CPWD ban khot noh ia ka tender.
U Deputy Commissioner u la kubur ba ka jingiakren ka la wanrah ia ka jingsngewthuh kaba shai bad u la kyntu ruh ia ka tnad treikam jong ka CPWD ban sdang noh kham kloi ia ka kam katba lah.
U Bah Banshai u la ai ia ka jingkular hakhmat jong u ba ngan iai bud dien ia kane ka kam tad haduh ban da urlong khlem da shongthait kumba la ju iai bud naduh kaba sdang bad nga dawa jur ruh ia ka tnad jong ka CPWD ban khot noh ia ka tender kham kloi katba lah khlem da pynslem shuh hapoh jong une u snem bad ruh ban jied ia ki Contractor kiba lah ban shim ia ka kam bad ruh ban sdang mardor khlem da buhteng shuh, hynrei lym kumta ym banse wad ban shim da kiwei pat ki bynta kat haduh ban poi shaduh u pud jong ka jingiakhih na bynta ka dawbah jong ki khynnah pule ha katei ka skul.
