Shillong, Nailur 18: U myntri khynnah jong ka sorkar pdeng ba dei peit ia ka tnad korbar ri u M. J. Akbar mynta ka sngi u la ia shim bynta ha ka jingpynkhuid shnong ha shnong Mawklot ha Upper Shillong kaba hap hapoh jong ka Mylliem C&RD Block. Ia kane ka jingpynkhuid shnong la pynlong da ka District Swachhata Bharat Mission (Gramin), East Khasi Hills District kaba dei na ka Swachhata Hi Seva, 2018.
Haba kren ha kane ka jingpynkhuid shnong, u myntri khynnah ka sorkar pdeng u M J Akbar u la ong ba ka “Swachhata Hi Seva campaign” ia kaba la plie paidbah da u myntri rangbah duh jong ka Ri India ka long ban pynurlong ia ka jingthrang jong u kpa ka jaidbynriew u Mahatma Gandhi ban pynioh ia ka Ri India kaba khuid.
Kane ka jingpynkhuid shnong ka kynthup ruh ia ka jingshna ia ki painkhana ha ki iing briew ba ka jigleit sha bar kan nym long madan madiah, u myntri ka sorkar pdeng u la kyntu ia ki paidbah ban beteng ia kane ka jingleh khuid na ka bynta ka jingkoit jingkhiah jong ki khynnah bad ka pateng ban wan. Ha kane ka sngi u myntri ka sorkar pdeng u la kren ruh ia shibun ki skhim kiba ka sorkar pdeng kala leh.
Ha kane ka sngi pynkhuid shnong la don lang ruh u myntri ka tnad PHE jong ka sorkar jylla u Bah Samlin Malngiang, u myntri ba dei peit ia ki kam pynroi sor u Bah Hamletson Dohling, u ba dei ruh u MLA jong katei ka jaka, u Bah W. R. Lyngdoh, Secretary PHE, u Mission Director, SBM (G), u Bah P. S. Dkhar, Deputy Commissioner East Khasi Hills, Bah P. T. Passah, BDO, Mylliem C&RD Block bad kiwei kiwei de.
