Shillong, Nailur 25: ka jingslap jur ha kine ki sngi kala pynlong ba ka wah kynshi ha West Khasi Hills District kan shlei bad ktah ruh ia shibun ki iing briew ha kaba kila hap ban mih na la ki iing ki sem ban leit na ka jingmynsaw.
Kane ka jingshlei um ha ka wah Kynshi, khamtam hapoh shnong Kynshi kam dei shuh ka jingjia kaba thymmai ne kaba jia tang mynta ka dei ka jingjia kaba la juh jia man u snem haba la don ka jingslap kaba jur bad mynta ka sngi ruh ka um kala tam ia ka thep shnong Kynshi ha kaba bun bah ki iing ki sem kila shah ktah.
Ka jingshlei ka wah Kynshi ha shnong Kynshi ka ktah ia ka West Khasi hills baroh kawei namar ka surok bah ban leit sha Nongstoin bad sha Garo Hills ka iaid lyngba kane ka shnong bad shisien ba la don ka jingshlei um ha kane ka shnong Kynshi la sah kut ka leit ka wan.
Ki trai shnong kim kham tip kham bha ha kaba ia dei bad kane ka jingshlei um ha kane ka shnong Kynshi namar kala jia na ka por sha ka por, lada ka jingkiew jong ka um kam pat ktah ia ki jaka shnong briew kan nym da don eh kata ka jingsngew ban ong ka shlei um hynrei mynta la ioh ba bun bah ki iing kila ngam ha ka um.
Ka jingkylli ka long balei, hato ka sorkar, ki bor pyniaid shnong ki don ne em kata ka jingpyrkhat ban wad lat kumno ban pynlait ia ki briew kane ka shnong kiba la shah ktah man ka por haba don ka jingjur jong u slap bad khamtam ka surok ba kan nym don ka jingthut ka leit ka wan namar ka jingshah tap ka surok ha ka um kaba kiew na Wah Kynshi.
