Shillong Nailur 21: U bah Gavin M Mylliem MLA jong ka Sohra na ka NPP u la kyntu ia ka sorkar jylla ba ka dei ban tuklar ban iakren bad ki BSF kumjuh bad ka sorkar India na bynta ban ai ka jingiarap sha ka long ing jong u bah Running Nongkynrih uba la shah siat iap ha ki shipai BSF ha ka 5 tarik Jymmang ha Mawshun.
U bah Gavin uba la wanrah ia kane ka mat iatai ha ka Zero Hour u la ong ba la saw bnai la iaid, hynrei haduh mynta ka long ing jong u bah Running Nongkynrih 34 snem uba dei u nongshong shnong Jalateng kim pat ioh kano kano ka jingiarap.
Katkum ka jingong u bah Gavin, ki ba ha iing jong u bah Nongkynrih kidei na ka long ing ba duk bha bad u la kyntu ia ka sorkar jylla ba kadei noh jingiarap lang sha kane ka longiing.
U Symbut Myntri Rangbah ka jylla u bah Prstone Tynsong haba jubab ia katei ka mat ia kren u la ong ba ka jingtohkit ka dang iaid shakhmat. Haba iadei bad kane ka jingjia, u la pyntip ba ki don ar tylli ki ejahar kawei kadei na ka liang kiba ha iing u bah Nongkynrih bad kawei na ki shipsai BSF.
U Symbud Myntri Rangbah u la ong ba katkum ka ejahar ba la ujor da kiba ha iing, la pyntip ba une u nongmudui bad u bakha jong u, uba iap ki dang leit sha Umthli ban kit ia ki muid sha u trai hynrei haba poi hajan shnong Mawshun, une uba iap ula phai sha ka mon khnang ban pynhiar ia ki muid.
Hynrei, ha katei ka por kawei ka trok barit ki BSF kaba bud nadien kala ieng bad khlem kano kano ka jingmaham, ki shipai BSF kila wan tur bad ki la sdang ban synreit kuli ha kaba ka la poi sha ka jingiap u bah Runing.
U bah Prestone u la ong ruh ba ha ka ejahar ba la jor da ki shipai BSF pyrshah ia u Bah Running, ki BSF kila iathuh ba ha katei ka miet jong ka 5 tarik Jymmang, ka Mobile Check Post (MCP) party jong ka G-Company 4th Battalion BSF kiba don ha surok Pynursla-Dawki marjan ka shnong Wahkdiat.
Ki BSF ki la kynnoh ba u bah Running um shym la pynsahngeh ia ka trok kit muid wat hadien ba la phah sahngeh ia u hynrei ki la pyrshang ban phet, ki shipai ki la siat ar tylli ki kuli sha suin. U Symbud Myntri u la pyntip ba ka jingtohkit ka dang iaid bad la pynjur ia ki bor pulit ka jylla bad ka jinglong jingman ha katei ka jaka ka shongsuk.
