Shillong, Jylliew 29: “ Ngi dei ban don ia ki polisi kiba biang ban pynkhlain ia ka khaii pateng bad ka Bangladesh namar ka jylla Meghalaya ka don ia shibun ki kad khaii kiba pyniasoh bad ka thied ka ri” la ong u myntri rangbah ka jylla u Dr Conrad K Sangma.
“Nga la shim khia ia kane bad nga la ia kren bad ki bor jong ka sorkar pdeng ban don ka jingiajan bad ka Bangladesh ha khaii pateng, ka sorkar kala wat ki lat ki kynti kumno ban pynbha ia ki surok, dei na kane ka daw ba ka surok ban leit sha Gashuapara la shna mynta bad kum juh ki thain Ranikor Borsora” ong u myntri rangbah ka jylla.
Haba ia dei bad ka surok na Hills jong ka West Bengal lyngba ka Bangladesh ban pyniasoh sha Mahendraganj ha Garo Hills, ia kane ka kam la bud dien bad ka sorkar pdeng bad kane ka surok ha ki snem ban wan kan kylla long khyrdop ia ka dong shatei lam mih ngi jong ka Ri India.
Kane ka surok kaba dang ia kren mynta ka ban wan na Hills jong ka jylla West Bengal sha Garo Hills lyngba ka Bangldesh kan pyniasoh bad ka surok bah N.H-37 kaba la tip kum ka East Corridor ynda kane ka surok kan urlong ka Garo Hills ka long shi sha ka khyrdop ia ka Dong Shatei lam mihngi ka Ri India.
Ka don ka jingpynkhreh ban don ia ka surok ha shilynter ka khappud bad ka Bangladesh na Mahendraganj South West Garo Hills sha duh Ratachera jong ka East Jaintia Hills District, kane kan kyntiew ia ka khaii pateng kaba dei ka ioh ka kot jong ka jylla Meghalaya ha ki snem ki ban wan la ong u myntri rangbah.
