Shillong, Nailur 23: Ka Sorka Jylla kala rai ban phah weng noh na ka Sorkar Pdeng ia ki katto katne ki kyndon khnang ba kan plie lynti ha ka jingpynheh ia ka kad liengsuin Shillong Airport.
Ka Kynhun Myntri ka Jylla kan sa shong jingialang ha ka sngi Balang ban ai jingmynjur ia ka jingtyrwa ban thied ia ka jaka ba 22 acre na ka bynta ban pynheh ia ka kad khnang ba ki liengsuin kiba heh kin lah ban wan hiar ha kane ka kad liengsuin ka Jylla.
Ia kane la pyntip da u Symbud Myntri Rangbah ba khmih ia ka Tnad Transport bah Sniawbhalang Dhar ha ka jingleit jurip ia ka Shillong Aiport mynta ka sngi ka 23 tarik u Nailur 2024.
Ha kane ka jingleit jurip na ka liang u Myntri u la ioh ruh ban lum ia ka jingialang bad ki ophisar na ka Tnad Civil Aviation Ministry bad ka Airport Authority of India. Kiba iadonlang ki kynthup ia u Chief Secretary, u Commissioner bad Secretary ka tnad Transport bad ki ophisar.
Ha ba kren hadien ba la dep ka jingialang na ka liang u bah sniawbhalang Dhar u la pyntip ba ka Sorkar Jylla kala shimkhia bha ia ka jingpynheh ia ka Shillong Airport khnang ba ki lieng suinkiba heh ki lah ban hiar ha kane ka kad liengsuin.
U la ong ruh ba la ioh pdiang ia ka kaiphod kaba ar na ka Airport Authority of India (AAI) kaba pynpaw ba ka lynti ka don ban pyniar ia ka runway jong ka kad hynrei ki don pat katto katne ki jingwit, kiba hap ban iakren bad ka Sorkar India hashuwa ban pyniaid shakhmat ia ka project ban pynheh ia kane ka kad.
U Myntri u la pyntip ruh ba lada ka Sorkar India kam pyllait ia ngi na kine ki kyndon, ka jinglut kan dei kaba bun bha ia ngi ba ngin pynlut. Lada ka pyllait, ngi lah ban pynheh ia ka kad tang hapoh ki khyndiat snem naduh mynta.
U la ong ruh ba nalor kata, kat kum ka sorjamin ba khatduh, ngi kwah ban iaid lait ia u lum bad kumta ngin hap ban pyniar ia ka runway-900 meter hapoh ka jaka lajong. Lada ki hap mait ia u lum, ka jinglut kan kot ia palat T.8000 klur.
U Bah Sniawbha u pyntip ruh ba ka Sorkar ka donkam ban hap thied jaka sa 22 acre na ka bynta ban pynhreh ia ka project ha kaba 16 acre kan long ia ki bynta jong ka jingshngain bad 6 acre ban pynlong kum ki jaka pynieng ia ki liengsuin kiba heh.
