Shillong, Nailur 24: Mynta ka sngi baroh ki seng sain pyrthei kiba don ia ki MDC hapoh ka iing dorbar jong ka KHADC, kila ia poi sha ka jingialang kaba la khot da u Bah Teinwell Dkhar Chief Executive member ban ia kren halor ka jingpynkylla ia ka Sixth Schedule da ka sorkar pdeng.
Ha ka jingiakynduh lang jong baroh ki MDC, kiba dei na ki seng sain pyrthei bapher bapher kila ia poi bad ha kane ka jingiakren kila ia poi ha ka jingiasngewthuh lang ban pyrshah ia ka jingthmu ban thung MDC ia kiwei ki jaidbynriew rielwum hapoh jong ka KHADC.
U bah Teinwell Dkhar CEM jong ka KHADC u la iathuh ba ha kane ka jingialang kala pynpaw ba ki pyrshah ia ka jingthmu jong ka sorkar pdeng ban thung MDC ia kiwei pat ki jaidbynriew riewlum ia kaba la thoh “Unrepresented tribe”.
Ha kane ka jingialang la ia kren ruh ba dei ban pynneh ia ki konstitwensi kumba ka long 29 tylli ha kaba ia ki MDC yn jied da ka ilekshon bad ar ngut yn shuh tung. Na ka liang jong ki seng sain pyrthei kiba la poi sha kane ka jingialang ki pynpaw ba ki pyrshah ia ka jingpynbun ia ki konstitwensi hapoh jong ka KHADC.
